साय कैबिनेट के बड़े फैसला: छत्तीसगढ़ आबकारी नीति 2026-27 ला मिलीस मंजूरी, नवा रायपुर में खुलही बड़े कॉलेज
Chhattisgarh Cabinet Decisions : रायपुर, 21 जनवरी 2026: मुख्यमंत्री विष्णुदेव साय के अध्यक्षता में बुधवार के दिन कैबिनेट के एक बड़े बैठक होइस। नवा साल के ए पहिली बैठक में साय सरकार ह कई ठन जरूरी फैसला ऊपर मुहर लगाइस हे। बैठक में शराब नीति ले लेके पढ़ाई-लिखाई अउ अस्पताल मन के सुविधा ला बढ़ाए बर कतको निर्णय ले गे हें।
शराब नीति अउ नवा कॉलेज बर जमीन
कैबिनेट ह छत्तीसगढ़ आबकारी नीति 2026-27 के प्रस्ताव ला मंजूरी दे दीस हे। एकर संग ही, नवा रायपुर (अटल नगर) ला शिक्षा के हब बनाए बर एक बड़े फैसला ले गे हे। नरसी मोंजी मैनेजमेंट संस्थान (NMIMS) ला सेक्टर-18 में लगभग 40 एकड़ जमीन 90 साल के लीज ऊपर दे के मंजूरी दे गे हे। ए संस्था ह बहुत नामी आय अउ एखर आए ले छत्तीसगढ़ के लइका मन ला मैनेजमेंट के पढ़ाई बर बाहिर नहीं जाय बर पड़ही।
आईटी अउ स्टार्टअप ला बढ़ावा
नवा रायपुर में ही आईटी क्षेत्र ला मजबूत करे बर ‘सॉफ्टवेयर टेक्नोलॉजी पार्क्स ऑफ इंडिया’ (STPI) के संग एमओयू (MOU) करे के फैसला होइस हे। एखर तहत 4 ठन नवा उद्यमिता केंद्र खोले जाही। ए केंद्र मन के जरिए एआई (AI), स्मार्ट सिटी, अउ खेती-किसानी ले जुड़े नवा तकनीक ऊपर काम करइया 133 स्टार्टअप ला बढ़ावा दिए जाही। एखर ले राज्य के बेरोजगार अउ पढ़े-लिखे जवान मन ला नवा अवसर मिलही।
सरकारी अस्पताल मन में बढ़ही जांच के सुविधा
गाँव अउ शहर के गरीब मनखे मन ला बढ़िया इलाज मिले, एखर बर कैबिनेट ह स्वास्थ्य विभाग ला लेके घलो फैसला करिस हे। अब राज्य के जम्मो जिला अस्पताल, सामुदायिक स्वास्थ्य केंद्र (CHC) अउ प्राथमिक स्वास्थ्य केंद्र (PHC) में लैब के सुविधा ला अउ मजबूत करे जाही। सरकार के कोशिश हे कि जम्मो जरूरी जांच अस्पताल में ही मानक के हिसाब ले होवय, ताकि मरीज मन ला प्राइवेट लैब में जाके पैसा झन फूंके बर पड़य।
