गैस के किल्लत ला लेके डिप्टी सीएम अरुण साव कहिन बड़े बात….
Gas Cylinder Shortage : रायपुर। परदेस में गैस सिलेंडर बर एजेंसी मन में लगे मनखे मन के लंबी कतार ला देख के उप मुख्यमंत्री अरुण साव के बड़े बयान आगू आए हे। ओमन मनखे मन ले बिनती करे हें कि घबराय के कोनो जरूरत नहीं हे अउ अफवाह ले बचके रहव।
डिप्टी सीएम अरुण साव ह शनिवार के मीडिया ले गोठबात करत कहिन कि दुनिया भर के परिस्थिति अउ कुछु गलत अफवाह के सेती अइसन माहौल बन गे हे। ओमन साफ करिन कि देस में पेट्रोल अउ गैस के कोनो कमी (शॉर्टेज) नहीं हे। साव ह कहिन, “मनखे मन थोड़कुन धीरज रखव, सरकार कालाबाजारी करे वाला मन के खिलाफ कड़ा कार्रवाई करत हे।”
अफीम के खेती अउ कांग्रेस के घेराव पर पलटवार
कांग्रेस कोती ले अफीम के खेती ला लेके विधानसभा घेराव के तैयारी पर साव ह हमला बोलिन। ओमन कहिन कि कांग्रेस के राज में च नसा के कारोबार फलिस-फूलिस हे। मुखबिर के सूचना मिले के बाद हमर सरकार ह तुरंत अउ कठोर कार्रवाई करे हे। मुख्यमंत्री ह पूरा राज में सर्वे के आदेश दे हें, जहाँ घलो गड़बड़ी मिलही, उहाँ कड़ा सजा दिए जाही। कांग्रेस ला एमा राजनीति नहीं करना चाहिए।
‘गौधाम’ योजना के सुरूआत
राज में आज ले सुरू होवत ‘गौधाम’ योजना के बारे में साव ह कहिन कि कांग्रेस ह ‘गौठान’ ला सिरिफ जनता के पइसा लूटे बर बनाय रहीस, ओमन ला गौ माता के सेवा ले कोनो मतलब नहीं रहीस। हमर सरकार आज ले गौधाम योजना सुरू करत हे, जेकर तहत पूरा परदेस में 1460 गौधाम बनाय जाही। एमा चरवाहा मन ला मानदेय अउ पसु मन बर चारा के पूरा इंतजाम करे गे हे।
