उच्च शिक्षा मंत्री के ऐलान: छत्तीसगढ़ के कॉलेज मन म होही 700 सहायक प्राध्यापक मन के भरती
CG Professor Recruitment 2026 : रायपुर। छत्तीसगढ़ के कलेज मन म शिक्षक मन के कमी ला दूर करे बर उच्च शिक्षा विभाग ह बड़ कदम उठाए हे। राज्य के सरकारी कलेज मन म 700 सहायक प्राध्यापक (Assistant Professor) मन के भरती प्रक्रिया जल्दीच सुरू करे जाही।
बुधवार के दिन मंत्रालय म उच्च शिक्षा मंत्री टंक राम वर्मा के अध्यक्षता म एक बड़ समीक्षा बैठक होइस, जेम कतको सुग्घर फैसला ले गिस। बैठक म मंत्री जी ह कलेज मन म खाली पड़े 700 सहायक प्राध्यापक के पद मन म तुरंते भरती सुरू करे बर हरी झंडी दे दीस हे।
31 जुलाई तक होही प्राचार्य मन के पदोन्नति (प्रमोशन)
मंत्री वर्मा ह अधिकारी मन ला कड़क हिदायत दे हें कि भरती के काम म कोनो घलो ढिलाई नहीं होना चाहि। उच्च शिक्षा मंत्री ह अधिकारी मन ला 31 जुलाई तक स्नातक प्राचार्य मन के प्रमोशन (पदोन्नति) के काम ला पूरा करे के निरदेस दे हें। ओ मन कहिन कि, “नवा शिक्षा सत्र म कोनो भी कलेज बिना परमानेंट (नियमित) प्राचार्य के नहीं रहना चाहि।”
CGPSC के माध्यम ले प्राध्यापक मन के सीधी भरती के दस्तावेज सत्यापन (Document Verification) के काम ला घलो तेजी ले करे जाही।
अतिथि शिक्षक अउ बाकी कर्मचारी मन बर घलो फैसला
प्रमोशन: साल 2019 के पहिली के सहायक प्राध्यापक मन ला 1990 के नियम के तहत प्राध्यापक पद म प्रमोट करे जाही।
अतिथि प्राध्यापक: अतिथि शिक्षक मन के मांग मन बर बने कमेटी के रिपोर्ट ऊपर सरकार जल्दीच कारवाही करही।
चतुर्थ श्रेणी भरती: कलेज मन म सहायक ग्रेड-3 अउ चतुर्थ श्रेणी (क्लास-4) के पद मन म भरती ला साफ-सुथरा ढंग ले करे बर ‘राज्य कर्मचारी चयन आयोग’ ला जिम्मा दिए जाही।
कलेज मन म चल्ही 90 घंटा के अंग्रेजी कोर्स
गांव अउ आदिवासी इलाका के लइका मन के अंग्रेजी ला सुधारे बर कलेज मन म 90 दिन अउ 90 घंटा के विशेष अंग्रेजी संप्रेषण (English Communication) कोर्स चलाए जाही।
गड़बड़ी करइया मन खैर नहीं!
मंत्री टंक राम वर्मा ह साफ कहि दिन हें कि रुपिया-पैसा के कोनो भी गड़बड़ी ला बर्दाश्त नहीं करे जाय। नवा कलेज मन के विकास बर बजट म अलग से बेवस्था करे जाही। एकरे संग, राष्ट्रीय शिक्षा नीति (NEP) ला अब एम.ए., एम.कॉम, एम.एससी जइसे स्नातकोत्तर (PG) कोर्स मन म घलो लागू करे जाही।
