ज्ञानेश्वरी यादव ल मिलिही 30 लाख अउ डीएसपी के पद: कॉमनवेल्थ म पदक जीते बर सीएम साय करिन सम्मान
रायपुर। ग्लासगो म आयोजित कॉमनवेल्थ गेम्स 2026 म वेटलिफ्टिंग (भारोत्तोलन) के 53 किलो वर्ग म चांदी के तमगा (रजत पदक) जीतके देश अउ छत्तीसगढ़ के नाव ऊंचा करेइया राजनांदगांव के बेटी ज्ञानेश्वरी यादव के आज मुख्यमंत्री निवास म मया-पिरीत के संग अब्बड़ स्वागत अउ सम्मान करे गिस। मुख्यमंत्री विष्णु देव साय ह ज्ञानेश्वरी ल ओकर ऐतिहासिक जीत बर बधाई देवत 30 लाख रुपिया के प्रोत्साहन राशि अउ सोझ (आउट ऑफ टर्न) डीएसपी पद म नौकरी देके ऐलान करिन। मुख्यमंत्री ह कहिन कि ई सम्मान प्रदेश के प्रतिभा, मेहनत अउ संकल्प के सम्मान ए।
पहलीच कॉमनवेल्थ गेम्स म जीतिस चांदी के तमगा मुख्यमंत्री साय ह कहिन कि ज्ञानेश्वरी यादव ह अपन पहलीच कॉमनवेल्थ गेम्स म रजत पदक जीतके ई साबित कर दिस कि मजबूत इच्छाशक्ति, कड़ा मेहनत अउ अनुशासन के बल म कोई घलो लक्ष्य असंभो नइ होवय। ओमन बताइन कि माइलोगन मन के 53 किलोग्राम भारोत्तोलन स्पर्धा म कुल 199 किलोग्राम वजन उठाके ज्ञानेश्वरी ह न सिर्फ देश बर पदक जीतिस, बल्कि पूरा छत्तीसगढ़ ल गौरवान्वित करिस। ई सफलता प्रदेश के खेल इतिहास म सुनहरा पन्ना के रूप म दर्ज होही।
ज्ञानेश्वरी ह अपन सपना ल कभू कमजोर नइ होवे दिस- सीएम साय मुख्यमंत्री साय ह कहिन कि साधन-संसाधन के कमी अउ कतकोन चुनौती के बादो ज्ञानेश्वरी ह अपन सपना ल कभू कमजोर नइ होवे दिस। कठिन परिस्थिति म घलो लगातार अभ्यास, अनुशासन अउ समरपन के बल म ओ ह अंतरराष्ट्रीय मंच म सफलता पाए हे। ओकर सफलता प्रदेश के युवा मन, अउ खास करके बेटियां मन बर प्रेरणा के सोता (स्रोत) ए कि अगर लक्ष्य साफ होय अउ मेहनत ईमानदारी ले करे जाय त कोई घलो मंजिल दूरिहा नइ रहय।
सरकार ल अपन ई बेटी ऊपर गरब हे- सीएम साय मुख्यमंत्री ह कहिन कि प्रदेश सरकार ल अपन ई बेटी ऊपर गरब हे। एही भावना के संग राज्य सरकार ह ओला सोझ डीएसपी पद म पदोन्नति देके फैसला करे हे, ताकि ओकर सफलता के सम्मान होवय अउ प्रदेश के दोसर खिलाड़ी घलो बढ़िया प्रदर्शन करे बर प्रेरित होवयं।
सीएम ह कहिन कि ग्लासगो जाय ले पहली ओकर ज्ञानेश्वरी ले भेंट होए रिहिस, ओ बेरा ओमन ओला नीक प्रदर्शन बर सुभकामना दे रिहिन। जीत के बादो ओमन वीडियो कॉल ले बधाई दिए रिहिन। मुख्यमंत्री विष्णुदेव साय ह आज मुख्यमंत्री निवास म ओकर स्वागत करत कहिन कि ई पूरा प्रदेश बर गरब अउ तिहार मनाए के बेरा ए।
मुख्यमंत्री ह कहिन कि राज्य सरकार खेल प्रतिभा मन ल आगू बढ़ाए बर आधुनिक खेल ढांचा, बढ़िया कोचिंग, जरूरी संसाधन अउ हरसंभव प्रोत्साहन दे बर लगातार काम करत हे। सरकार के सोच अइसन माहौल बनाए के हे, जिहां प्रदेश के हर होनहार खिलाड़ी अपन क्षमता के हिसाब ले आगू बढ़ सकय अउ देश-दुनिया म छत्तीसगढ़ के नाव रोशन कर सकय।
खिलाड़ी देश-प्रदेश के नाव रोशन करयं- सीएम साय ओमन कहिन कि प्रदेश सरकार के कोसिस हे कि छत्तीसगढ़ के जादा ले जादा खिलाड़ी ओलंपिक, कॉमनवेल्थ, एशियन गेम्स अउ दोसर अंतरराष्ट्रीय प्रतियोगिता म तिरंगा फहरावयं। ज्ञानेश्वरी यादव असन खिलाड़ी मन के सफलता नवा पीढ़ी के आत्मविश्वास बढ़ाए के काम करही। मुख्यमंत्री ह भरोसा जताइन कि ज्ञानेश्वरी आने वाला समय म घलो अपन नीक प्रदर्शन ले भारत अउ छत्तीसगढ़ के नाव ल नवा ऊंचाई म पहुंचाही।
मुख्यमंत्री ह कहिन कि गुणी मन ल पहचानना, ओमन ल मौका देना अउ ओकर सफलता के सम्मान करना सरकार के खेल नीति के मूल आधार ए। एही प्रयास आने वाला समय म छत्तीसगढ़ ल खेल के दुनिया म देश के अगुआ राज्य मन म स्थापित करही।
