मानसून सत्र बर भाजपा के तैयारी: विपक्ष के हर हमला के करारा जवाब देही विधायक मन, ‘नकटी’ मामला म घलो रणनीति तैयार!
BJP MLA Meeting Raipur : रायपुर : छत्तीसगढ़ विधानसभा के मानसून सत्र सुरू होए के 6 दिन पहिली ही भाजपा ह अपन विधायक दल के बड़ बैठक बुलाईस। मंगलवार के रात मुख्यमंत्री निवास म होए ये बैठक म विपक्ष (कांग्रेस) ल सदन म घेरे अउ ओकर हर सवाल के आक्रामक जवाब देवे बर तगड़ा रणनीति तैयार करे गे हे। बैठक म साफ कह दिए गे हे कि कांग्रेस के कोनो भी सवाल ले डरे या दबे के जरूरत नहीं हे, बल्कि तका अउ तथ्य के संग ओ मन ल करारा जवाब देना हे।
‘नकटी’ मामला म कांग्रेस ल घेरही भाजपा
बैठक म नवा रायपुर के ‘नकटी’ गांव के मामला प्रमुखता से उठीस। पिछले कुछ दिन ले कांग्रेस ह ये मुद्दा म सरकार ऊपर लगातार हमला करत हे। भाजपा ह तय करे हे कि यदि विपक्ष ह ये मामला ल विधानसभा म उठाही, त सिर्फ मंत्री मन ही नहीं, बल्कि जम्मो विधायक मन घलो पूरा तथ्य के संग जवाब देहीं। बैठक म ये बात घलो साफ करीस कि माननीय मन (विधायकों) के बंगला बर कोनो अतिक्रमण नहीं तोड़े गे हे। विधायक आवास बर अभी तक समिति कोति ले कोनो औपचारिक प्रस्ताव नहीं आए हे, सरकार ह सिर्फ हाउसिंग बोर्ड के रियायती दर म जमीन देवत हे।
सत्र म आही 7 नवा विधेयक
एदारी के मानसून सत्र म सरकार डाहर ले 7 नवा विधेयक विधानसभा म पेश करे जा सकत हे। एमां वाणिज्य अउ कृषि विभाग से जुड़े जरूरी कानून शामिल हें। बैठक म ये घलो तय कर दे गे हे कि सदन म कउन से मुद्दा म कउन मंत्री अउ कउन विधायक सरकार के कोति ले बात रखही, जेकर सेती जम्मो झन ल ओकर जिम्मेदारी सोंप दिए गे हे। नेता मन ह कीस कि सरकार के ढाई साल के कार्यकाल पूरा हो गे हे, अब सिर्फ योजना के घोषणा नहीं, बल्कि काम के रिजल्ट ल सदन म दिखाना हे।
ये मंत्री अउ विधायक मन नहीं पहुँच पाईन
बैठक म कुल 13 मंत्री अउ 33 विधायक मन सामिल होइन। कुछ जरूरी काम अउ पारिवारिक कार्यक्रम के सेती उपमुख्यमंत्री विजय शर्मा, विधायक अमर अग्रवाल, राजेश मूणत, रायमुनी भगत, रेणुका सिंह, चेतराम अटामी अउ भैयालाल राजवाड़े ये बैठक म नहीं आ पाइन।
परंपरा ले हटके 6 दिन पहिली काबर होइस बैठक?
अक्सर देख जाथे कि विधानसभा सत्र सुरू होए के एक दिन पहिली विधायक दल के बैठक होते, पर एदारी भाजपा ह 6 दिन पहिली ही बैठक रख लीस। एकर कारण ये बताए गिस कि आने वाले दिन म पार्टी के बहुत सारे सांगठनिक कार्यक्रम हे, जेकर सेती पहिली ले रणनीति बना लेहे म विधायक मन ल घलो तैयारी बर अच्छा समे मिल जाही।
