भिलाई के स्कूल मं छात्र ह अपन क्लासमेट ला कटर ले मारिस, 28 टांका लगिस परिजन स्कूल पहुंचके मचाइन हंगामा

भिलाई मं एक स्कूल मं छुट्टी के टाईम झगरा के बाद एक बड़ा मामला निकल के आइस हे। जानकारी मुताबिक, एक छात्र ह अपन क्लासमेट ऊपर कटर ले हमला कर दिस, जेन मं लहूलुहान होगे अउ ओकर देह मं करीब 28 टांका लगे हे। ये घटना के बाद स्कूल मं अफरा-तफरी मच गे।

बताय जावत हे कि छुट्टी के टाइम मं दूनो छात्र के बीच पुराना विवाद चलत रहिस। बात-बात मं गुस्सा बढ़गे अउ आरोपी छात्र ह अपन बैग मं रखे कटर निकालके हमला कर दिस। घायल छात्र ला तुरंत अस्पताल ले जाके भर्ती कराय गे, जिहां डाक्टर मन कहिन कि जख्म गहरा हे, फेर हालत अभी स्थिर हे।

घटना के खबर मिलतेच परिजन मन स्कूल पहुंचके जोरदार हंगामा करिन, ओमन स्कूल प्रबंधन ले पूछिन कि सुरक्षा व्यवस्था कहां रहिस। पुलिस टीम ह मौके मं पहुंचके मामला शांत कराइस अउ आरोपी छात्र ला हिरासत मं लेके पूछताछ करत हे।

स्कूल प्रबंधन ह कहे हे कि ओमन पूरा मामला के जांच करत हें, अइसन घटना दुबारा न होय बर सख्त कदम उठाए जाही।