MMS वायरल केस : पुलिस के नोटिस के बाद कोतवाली थाना पहुँचिन विधायक देवेंद्र यादव
Bhilai MLA Devendra Yadav : दुर्ग। विधानसभा चुनाव के बेरा भिलाई विधायक देवेंद्र यादव के एक ठन बहुचर्चित एमएमएस वायरल होय के मामला म जांच एक बार फेर तेज हो गे हे। पुलिस के नोटिस मिले के बाद आज विधायक देवेंद्र यादव अपन फोटो अऊ वीडियो के सैम्पल दे बर भिलाई नगर कोतवाली थाना पहुँचीन। करीब ढाई साल पुराने ये मामला ला लेके विधायक ह काफी आक्रामक तेवर म नजर आईं।
थाना पहुँचे विधायक यादव ह कहिन कि ये मामला म ओ मन खुद प्रार्थी (शिकायतकर्ता) हें, फेर पुलिस ह शासन-प्रशासन के दबाव म आके सिरिफ ‘नोटिस-नोटिस’ खेलत हे। ओ मन आरोप लगाईन कि पुलिस ह ओ मन ला 6 अप्रैल के नोटिस भेजके ओही दिन बिहनिया 11 बजे थाना बुलाय रहिस, फेर डाक ले वो नोटिस दुपहार 1 बजे ओ मन ला मिलीस।
विधायक यादव ह कहिन कि चुनाव के समय ये एमएमएस वायरल करके ओ मन के सामाजिक छवि ला खराब करे के कोसिस करे गे रहिस। आज ढाई साल बीत जाय के बाद घलो पुलिस ह जांच पूरा नई कर पाईस हे। ओ मन विधानसभा म घलो ये मुद्दा ला उठाय रहिन कि जब भाजपा के एक मंत्री के कथित वीडियो के जांच सीबीआई (CBI) ले हो सकत हे, त ओ मन के मामला म सीबीआई जांच काबर नई कराय जा सकत? यादव ह मांग करीन कि ओ मन ला घलो न्याय मिलना चाहिये।
