ईडी के छापा में बड़का खुलासा; एक जम्मीन के दो बार मुआवजा डकारिन मंत्री के भाई, अइसने ‘खेल’ करके शासन ला लगाइन करोड़ों के चूना

Bharatmal Project Scam : रायपुर। भारतमाला परियोजना में मुआवजा बांटे ला लेके होय बड़ घोटाला के परत अब धीरे-धीरे उघरत जावत हे। ए मामला में ईडी (ED) ह आरोपी मन के घर में छापा घलो मारे हे। आरोप हे कि पूर्व मंत्री के रिश्तेदार भूपेंद्र चंद्राकर ह राजस्व अधिकारी मन के संग मिलके एक ही जम्मीन के दो बार मुआवजा डकार लीस। अइसने खेल गांधी परिवार अउ रोशन चंद्राकर ह घलो करे हें।

अइसन होइस पइसा के हेराफेरी: जानकारी के मुताबिक, पूर्व मंत्री अजय चंद्राकर के चचेरे भाई भूपेंद्र चंद्राकर ह एक ही जम्मीन के दो बार मुआवजा लिस हे। आरोप हे कि पहिली एक खसरा नंबर में पइसा लिस, ओखर बाद ओही जम्मीन ला अलग-अलग खसरा नंबर में दिखाके दोबारा भुगतान करा लीस। ए काम बर राजस्व रिकॉर्ड में घलो हेर-फेर करे गिस।

दस्तावेज मन के मुताबिक, खसरा नंबर 1259/2 के जम्मीन बर 75 लाख रुपया ले जादा के मुआवजा दरे गिस। ओखर बाद ओही जम्मीन ला 1259/3 अउ 1259/4 के नाम ले दिखाके फिर ले करोड़ों रुपया झटक लीन। कुल मिलाके 0.1200 हेक्टेयर जम्मीन ऊपर 2 करोड़ 67 लाख रुपया ले जादा के मुआवजा पास करा ले गिस।

2 जम्मीन ऊपर चार बार मुआवजा: नान घोटाला के आरोपी रोशन चंद्राकर ह घलो अलग-अलग खसरा नंबर के सहारा लेके मुआवजा लिस हे। ओला खसरा नंबर 1259/6, 1259/5 अउ 1502/2 बर अलग-अलग किस्ती में करोड़ों के भुगतान करे गिस। कुल 0.1200 हेक्टेयर जम्मीन बर 2 करोड़ 76 लाख रुपया ले जादा के राशि तय करे गिस।

जम्मीन ला टुकड़ा में बांटके बढ़ाइन कीमत: ए घलो बात आगू आईस हे कि जम्मीन ला छोटे-छोटे टुकड़ा में बांटके मुआवजा बढ़ाय के खेल घलो होय हे। आरोप हे कि गांधी परिवार ह जम्मीन ला कतकोन हिस्सा में बांटके 159 खसरा ला 80 मनखे मन के नाम कर दिस। एखर ले जम्मीन के कीमत 29.5 करोड़ ले बढ़के सीधा 78 करोड़ रुपया तक पहुंच गे।

का कहिथे शिकायतकर्ता: शिकायतकर्ता कृष्ण कुमार साहू के कहना हे कि ओ मन ह ए पूरा मामला के दस्तावेज 12 दिसंबर 2022 के मुख्य सचिव ला सउप दरे रिहिन। अब जाके मामला के जांच आगू आवत हे। ओ मन ह मांग करे हें कि ए पूरा कांड के निष्पक्ष जांच होय अउ दोषी मन ऊपर कड़ा कार्रवाई करे जाय।