देश के रक्षा करइया जवान के साथ लाखों के धोखाधड़ी, बैंक कर्मचारी ऊपर केस दर्ज

Chhattisgarh News : बालोद। छत्तीसगढ़ के बालोद जिला ले आर्मी के एक जवान के साथ ठगी के बड़े मामला आगू आए हे। अर्जुन्दा थाना क्षेत्र के ग्राम ओडारसकरी के रहइया जवान ह गुंडरदेही के एक निजी बैंक में 2 लाख रुपिया के लोन बर आवेदन देय रिहिस, फेर ओखर साथ धोखाधड़ी होगे।

पूरा मामला अइसन हे कि बैंक में काम करइया कर्मचारी रेखराम साहू ऊपर हेरफेर करे के आरोप लगे हे। जवान ह सिरिफ 2 लाख के लोन मांगिस रिहिस, फेर आरोपी ह चालाकी ले 17 लाख रुपिया के लोन सैंक्शन करवा दिस। जैसे ही जवान के खाता में पैसा आइस, आरोपी ह ओमा ले 15 लाख 50 हजार रुपिया दूसर खाता में ट्रांसफर करवा लिस। बता दन कि जवान के पोस्टिंग अभी जम्मू-कश्मीर में हे।

अइसने होइस ठगी के अहसास जवान ल ठगी के पता तब चलिस जब बैंक कोति ले लोन के किश्त पटाय बर दबाव आय लगिस। जवान ह हक्का-बक्का रह गे कि ओ ह तो सिरिफ 2 लाख बर आवेदन दे रिहिस, फेर ओखर नाम ले 17 लाख के लोन कइसे निकल गे। ठगी के जानकारी मिलत ही जवान ह गुंडरदेही थाना पहुंच के शिकायत दर्ज कराइस।

पुलिस ह शुरू करिस जांच गुंडरदेही टीआई नवीन बोरकर ह बताइस कि आर्मी जवान के साथ ठगी के मामला दर्ज कर ले गे हे। प्राइवेट बैंक के कर्मचारी रेखराम साहू के खिलाफ धारा 318(4) के तहत जुर्म दर्ज करे गे हे अउ पुलिस ह मामला के जांच करत हे।