अजित पवार के निधन ले देशभर म शोक के लहर : पीएम मोदी, राष्ट्रपति अउ अमित शाह समेत कई नेता मन दीन श्रद्धांजलि

Ajit Pawar Death : बारामती। महाराष्ट्र के उपमुख्यमंत्री अजित पवार (66 साल) के बारामती म होय विमान दुर्घटना म निधन ले पूरा देस म सोक के लहर हे। ए दुखद घटना म अजित पवार समेत जम्मो पांच झिन के मौत हो गे हे। ए बड़ हदासा ऊपर प्रधानमंत्री नरेंद्र मोदी, राष्ट्रपति द्रौपदी मुर्मू अउ गृहमंत्री अमित शाह समेत देस के बड़े नेता मन ह गहरा दुख जताय हें।

प्रधानमंत्री नरेंद्र मोदी ह सोसल मीडिया म सोक जतावत लिखिन कि, “अजित पवार जी जनता के नेता रहिन, जिनकर जमीनी स्तर म मजबूत जुड़ाव रहिस। महाराष्ट्र के मनखे मन के सेवा करे म ओमन हमेसा आगू रहिन अउ एक मेहनती नेता के रूप म ओकर बहुत सम्मान रहिस। ओकर अचानक निधन बहुत चोंकाय वाला अउ दुखद हे।”

गृहमंत्री अमित शाह ह अपन व्यथा जतावत कहिन कि, “आज एक दुखद हादसा म हमन अपन वरिष्ठ साथी अजित पवार जी ल खो देन। ओमन साढ़े तीन दशक ले महाराष्ट्र के हर वर्ग बर अपन आप ल समर्पित कर दे रहिन। ओकर जाना एनडीए परिवार अउ मोर बर व्यक्तिगत क्षति हे।”

राष्ट्रपति द्रौपदी मुर्मू ह अपन सोक संदेस म कहिन कि, “अजित पवार जी के असामयिक निधन एक अपूरणीय क्षति हे। महाराष्ट्र के विकास, खास करके सहकारी क्षेत्र म ओकर योगदान ल हमेसा सुरता करे जाही।”

अउ का कहिन आन नेता मन:

नितिन गडकरी: महाराष्ट्र के विकास के उम्मीद रखने वाला जननेता के जाना पूरा देस बर अइसन नुकसान हे जेकर भरपाई नइ हो सके।

अखिलेश यादव: अजित पवार जी के निधन अत्यंत दुखद हे, ईश्वर ओकर आत्मा ल सांति दे।

प्रियंका गांधी: आदरणीय शरद पवार जी, सुप्रिया सुले जी अउ जम्मो पवार परिवार बर मोर गहरा संवेदना हे।

इमरान प्रतापगढ़ी: ओमन ए हादसा के जांच कराय के मांग करे हें ताकि हदासा के सही कारन पता चल सके।