ओला-उबर ला तगड़ा झटका: आज ले शुरू होही पहिली सरकारी कैब सर्विस ‘भारत टैक्सी’, ड्राइवर मन ला नइ देना परही कोनो कमीशन

नई दिल्ली। ओला अऊ उबर कंपनी मन ला अब तगड़ा झटका लगे वाला हे। देस के पहिली कोऑपरेटिव कैब टैक्सी सर्विस, ‘भारत टैक्सी’ के आज ले सुरूवात हो जाही। केंद्रीय गृह मंत्री अमित शाह ह दिल्ली म एकर उद्घाटन करिहीं। भारत टैक्सी सर्विस के सबले बड़े खास बात ये हे कि एमां ड्राइवर मन ले कउनो किसम के कमीशन नइ लिये जाय। ड्राइवर मन खुद ए प्लेटफॉर्म के मालिक अऊ हिस्सेदार होहीं।

सहकारिता मंत्रालय के मुताबिक, ‘भारत टैक्सी’ के मकसद ड्राइवर मन ला प्राइवेट कंपनी मन के चंगुल ले आजाद कराना हे। ए टैक्सी सर्विस के ट्रायल 2 दिसंबर ले दिल्ली अऊ गुजरात के राजकोट म करे गे रहिस, जेहा पूरा तरीका ले सफल रहिस हे।

रिटायरमेंट सेविंग्स अऊ ड्राइवर मन ला मिलही मदद लॉन्चिंग के बखत अमित शाह ह 6 सबले बढ़िया काम करइया ड्राइवर मन ला (जेमन ला ‘सारथी’ कहे जाही) सम्मानित करिहीं। ए ड्राइवर मन ला कंपनी के शेयर सर्टिफिकेट घलो दिये जाही। सम्मानित ड्राइवर मन ला 5 लाख रुपिया के एक्सीडेंटल इंश्योरेंस अऊ 5 लाख के फैमिली हेल्थ इंश्योरेंस के सुविधा मिलही। एकर संग च प्लेटफॉर्म ले जुड़इया जम्मो ड्राइवर मन बर रिटायरमेंट सेविंग्स अऊ सपोर्ट सिस्टम के घलो बेवस्था करे गे हे।

जीरो कमीशन अऊ सर्ज प्राइसिंग ले राहत ओला अऊ उबर जइसन प्राइवेट कंपनी मन ड्राइवर मन के कमाई ले 20 ले 30 परसेंट कमीशन काट लेथें। एकर उल्टा, भारत टैक्सी ‘जीरो-कमीशन’ मॉडल म काम करही। मतलब ड्राइवर ह जतेक कमाही, ओहा सीधा ओकरे होही। एकर ले यात्री मन ला घलो फायदा होही काबर कि एमां ‘सर्ज प्राइसिंग’ (भीड़ के बखत जादा किराया) नइ रहे।

अगले 2 साल म हर सहर तक पहुंचे के लक्छ भारत टैक्सी के लक्छ हे कि अगले दू साल म देस के जम्मो राज्य अऊ बड़े सहर मन म एकर विस्तार करे जाय। एला सरकार के डिजिटल पब्लिक इंफ्रास्ट्रक्चर (DPI) ले घलो जोड़े जाही।

कोन चलाही भारत टैक्सी? एहा एक मेंबरशिप मॉडल आय, जेला ‘सहकार टैक्सी कोऑपरेटिव लिमिटेड’ ह चलाही। एकर स्थापना बीते जून म 300 करोड़ रुपिया के पूंजी संग करे गे रहिस। ए बोर्ड म अमूल के एमडी जयेन मेहता ह चेयरमैन अऊ NCDC के डिप्टी मैनेजिंग डायरेक्टर रोहित गुप्ता ह वाइस चेयरमैन हें।