एअर इंडिया ऊपर 1 करोड़ के भारी जुर्माना: बिना फिटनेस सर्टिफिकेट के 8 बार उड़ाईस जहाज, सुरक्षा मा बड़े लापरवाही
नई दिल्ली : टाटा ग्रुप के एअर इंडिया के मुसकिल मन कम होय के नाम नई लेवत हे। भारत के विमान नियामक डीजीसीए (DGCA) ह सुरक्षा नियम मन के अनदेखी करे बर एअर इंडिया ऊपर 1.10 लाख डॉलर यानी लगभग 1 करोड़ रुपिया के जुर्माना ठोक दिस हे। ये कार्रवाई एक ठन एयरबस जहाज ला बिना ‘एयरवर्थनेस रिव्यू सर्टिफिकेट’ (जहाज उड़े के लायक हे या नई, ओकर फिटनेस सर्टिफिकेट) के 8 बार सवारी मन ला बैठा के उड़ाए के सेती करे गे हे।
का हे पूरा मामला? ये मामला 26 नवंबर 2025 के आय, जब एअर इंडिया ह खुद डीजीसीए ला ये गलती के जानकारी दिस। जांच मा पता चलिस कि एयरलाइन के एक ठन एयरबस A320 नियो जहाज के फिटनेस सर्टिफिकेट खत्म हो चुके रहिस, तभो ले कंपनी ह लापरवाही देखात हुए 24 अउ 25 नवंबर के ओला 8 अलग-अलग रूट मा उड़ा दिस। डीजीसीए ह अपन आदेश मा साफ कहे हे कि अइसन गलती ले जनता के भरोसा एयरलाइन ऊपर ले कम होथे।
अहमदाबाद हादसा के बाद बाढ़गे सख्ती सुरक्षा नियम मन ला लेके डीजीसीए ह पिछले साल होय अहमदाबाद विमान हादसा के बाद ले जादा सख्त हो गे हे। पिछला साल 12 जून के एअर इंडिया के एक जहाज अहमदाबाद ले लंदन जात रहिस, जेहा उड़ान भरे के कुछू देरी बाद एक ठन बिल्डिंग ले टकरा गे रहिस। ओ हादसा मा 270 मनखे मन के जान गे रहिस। ओ भयावह घटना के बाद ले एअर इंडिया के सुरक्षा ऊपर लगातार सवाल उठत हे।
टाटा के आय के बाद घलो चुनौती बरकरार जब ले टाटा ग्रुप ह एअर इंडिया ला सम्हाले हे, तब ले सर्विस सुधारे के गोठ तो करे जाथे, पर नियम तोड़े के मामला थम नई पावत हे। एकर ले पहिली घलो पायलट मन के ट्रेनिंग मा कमी अउ तकनीकी खराबी के सेती कई बार जुर्माना लग चुके हे। एअर इंडिया ह अपन सफाई मा कहे हे कि उमन सब कमी ला दूर कर ले हें अउ आगू अइसन गलती नई होय, एकर रिपोर्ट नियामक ला सउँप दे हें।
