chhattisgarh tehsildar strike : रायपुर। छत्तीसगढ़ म नायब तहसीलदार से अभद्रता अउ मारपीट के मामला म तहसीलदार मनके प्रदेशव्यापी हड़ताल लगातार जारी हे। जेकर सेती अब 7 जून तक तहसील कार्यालय मन म कामकाज ठप रहे के संभावना हे। प्रदेशभर के नायब तहसीलदार अउ तहसीलदार मनके हड़ताल म जाय से आय-जाति, नामांतरण अउ राजस्व जइसन कतको बड़ काम मन रुक गे हें। तहसील कचहरी मन म लंबित मामला मनके संख्या ह बाढ़त जावत हे।

ए प्रदेशव्यापी हड़ताल के असर रायपुर म घलो देखे बर मिलत हे। मंगलवार के तहसील कार्यालय म सन्नाटा पसरे रीहिस। कतको लोगन मन अपन पेसी बर तहसील पहुंचे रीहिन, पर हड़ताल के पता चले के बाद ओमन ला बइरंग वापस लौटे बर पड़ीस।

ए मामला ला लेके हड़ताल म बइठिन तहसीलदार दरअसल, अभी हाल ही म सीतापुर म नायब तहसीलदार से अभद्रता अउ मारपीट के घटना होय रीहिस। एखर बाद से आरोपी मन ऊपर कार्रवाई के मांग ला लेके तहसीलदार अउ नायब तहसीलदार मन हड़ताल म चले गे हें। ए मामला म कार्रवाई बर सरकार से घलो गोठ-बात होय रीहिस, पर कोनो ठोस एक्शन नई होय से नाराज तहसीलदार मन हड़ताल के रस्ता चुनिन। ए मामला म तहसीलदार मनला कांग्रेस के घलो समर्थन मिले हे। हड़ताल ला जायज बतावत कांग्रेस ह भाजपा विधायक ला बचाए के आरोप सरकार ऊपर लगाय हे।

एक हफ्ता आगे बाढ़िस पेसी के तारीख हड़ताल के सेती तहसील कोर्ट मन म लंबित मामला मनके सुनवायी बर मंगलवार के जेकर-जेकर पेसी रीहिस, ओकर तारीख ला एक हफ्ता आगे बढ़ा दे गे हे। जानकारी के मुताबिक, 2 तारीख के होय वाली सुनवायी अब सीधा 8 तारीख के होही। ओही च कसन 3, 4, अउ 5 तारीख के होय वाली सुनवायी घलो अब अगिया हफ्ता होही।

आय-जाति, नामांतरण अउ राजस्व के काम अटकिस हड़ताल के सबले बड़ असर आम जनता ऊपर परत हे, लोगन मनके छोटे-मोटे काम घलो नई हो पावत हें। यहाँ आय-जाति, नामांतरण, मूल निवास, जनम-मरन प्रमाण-पत्र, त्रुटि सुधार अउ राजस्व जइसन आवेदन मनके निराकरण रुक गे हे। खसरा नंबर सुधार, सीमांकन के अलावा पुराना लंबित बटांकन अउ नामांतरण के काम घलो अटक गे हें।

दोषी विधायक ला बचावत हे सरकार: कांग्रेस कांग्रेस ह राजस्व अधिकारी मनके ए हड़ताल ला बिल्कुल जायज बताय हे। कांग्रेस संचार विभाग के अध्यक्ष सुशील आनंद शुक्ला ह कहिन कि भाजपा विधायक रामकुमार टोप्पो ला तुरंत गिरफ्तार करे जाना चइही। ओमन सत्ता के घमंड म मर्यादा ला लांघिन अउ नायब तहसीलदार से मारपीट करिन। शुक्ला ह कहिन कि ए बड़ दुरभाग के बात हे कि भाजपा ह दोषी विधायक ला गिरफ्तार करवाए के जगह ओखर बचाव करत हे। घटना ला एक हफ्ता बीत गे हे, पर सरकार कोनो ठोस कार्रवाई नई करे हे।