तीन दशक ले नक्सल क्षेत्र में जनसेवा के सम्मान, गोडबोले दंपत्ति ला मिलीस पद्म श्री
Padma Shri Godbole Couple : रायपुर। बस्तर के जंगलों में तीन दशक तक आदिवासी मन के सेवा करइया गोडबोले दंपत्ति ला आखिरकार देश के बड़का सम्मान मिल गए हे। राष्ट्रपति भवन में आयोजित समारोह में राष्ट्रपति द्रौपदी मुर्मू ह डॉ. रामचंद्र गोडबोले अऊ ओकर घरवाली सुनीता गोडबोले ला संयुक्त रूप से ‘पद्म श्री’ ले सम्मानित करिन। ए सम्मान जनजातीय स्वास्थ्य, कुपोषण दूर करे अऊ सामाजिक सेवा के क्षेत्र में ओमन के लंबा योगदान बर दिये गीस हे।
अबूझमाड़ ले राष्ट्रपति भवन तक के सफर
मूल रूप से महाराष्ट्र के रहइया डॉ. रामचंद्र गोडबोले आयुर्वेद के डॉक्टर हें। ओकर घरवाली सुनीता गोडबोले ह सोशल वर्क के पढ़ाई करे हे। दूनो ह साल 1990 में बियाह के बाद बस्तर जाय के फैसला करिन। ओ बखत दंतेवाड़ा अऊ अबूझमाड़ जइसन इलाका मन में दवाई-इलाज के कऊनो सुभीता नई रहीस।
गोडबोले दंपत्ति ह बारसूर क्षेत्र में एक छोटे से क्लिनिक ले अपन काम सुरु करिन। वहां आदिवासी मन के मुफ़्त में इलाज करे गीस। कतको बार जंगल के भीतर पैदल पहुंच के मरीज मन तक दवाई पहुंचाईन।
12 साल में 3 हजार गंभीर मरीज मन के इलाज
डॉ. गोडबोले ह सुरु के 12 बछर में 3 हजार ले जादा गंभीर बीमार आदिवासी मन के इलाज करिन। एकर बाद ओमन जंगल के भीतर 114 ले जादा बड़का मेडिकल कैंप लगाईन। ए कैंप मन में 9 हजार ले जादा गांव वाले मन के जांच होईस।
लगभग 400 गंभीर मरीज मन ला रायपुर के चैरिटेबल अस्पताल मन तक पहुंचा के इलाज घलो करवाईन। नक्सल प्रभावित इलाका मन में लगातार सेवा करना कतको सहज नई रहीस, फेर ए दंपत्ति ह अपन काम ला नई छोड़िन।
गोंडी अऊ हलबी सीख के जीतिन भरोसा
सुनीता गोडबोले ह आदिवासी माईलोगन अऊ लइका मन ले जुड़े बर गोंडी अऊ हलबी भासा सीखिन। एकर बाद गांव-गांव जाके माईलोगन मन ला पोषण अऊ स्वास्थ्य के प्रति जागरूक करिन।
आज बस्तर के तीन जिला के 37 स्कूल मन में लगभग 2 हजार लइका हर बछर ओमन के कार्यक्रम ले जुड़थें। पिछले पांच साल में ओमन ह 24 गांव के 460 लइका मन ला कड़ा कुपोषण ले बाहर निकाले में मदद करिन।
सिकल सेल ले लेके नोनी मन के शिक्षा तक काम
गोडबोले दंपत्ति ह सिर्फ इलाज तक अपन आप ला नई रोकिन। सिकल सेल एनीमिया जागरूकता, लइका मन के अधिकार अऊ आदिवासी नोनी मन के शिक्षा ऊपर घलो लगातार काम करिन। अभी के बखत में दूनो ह “बनफूल” नाम से एक संस्था चलावत हें। ए संस्था ह जनजातीय लइका मन के स्वास्थ्य अऊ पोषण ऊपर काम करथे।
पीएम मोदी अऊ अमित शाह ह दिनीन बधाई
प्रधानमंत्री नरेंद्र मोदी ह पद्म पुरस्कार विजेता मन ला बधाई देवत कीन कि अइसन लोगन देश के आघू के पीढ़ी मन बर प्रेरणा हें। केंद्रीय गृह मंत्री अमित शाह ह कीन कि पद्म पुरस्कार समाज ला बदले वाले लोगन के सम्मान आय।
ए बछर कुल 131 पद्म पुरस्कार दिये गीस हे। जेमा 5 पद्म विभूषण, 13 पद्म भूषण अऊ 113 पद्म श्री सामिल हें।
बस्तर के सेवा ला मिलीस राष्ट्रीय सम्मान
छत्तीसगढ़ सरकार ह एला राज्य बर गरब के बेरा बतईस हे। सरकार के कहना हे कि ए सम्मान सिर्फ गोडबोले दंपत्ति के नो हे, बल्कि बस्तर के आदिवासी समाज के सेवा अऊ संघर्ष के राष्ट्रीय पहचान आय।
