प्रदीप मिश्रा के कथा कराए के नाम म 21 लाख के ठगी; हालेकोसा के दिनेश साहू के खिलाफ FIR दर्ज
Pandit Pradeep Mishra : राजनांदगांव। सिहोर के मशहूर कथावाचक पंडित प्रदीप मिश्रा के शिवपुराण कथा कराए के नाम म 21 लाख रूपिया के धोखाधड़ी के मामला आगू आए हे। अंबागढ़ चौकी के ‘भोलेनाथ सेवा समिति’ ह छुरिया ब्लॉक के ग्राम हालेकोसा के रहइया दिनेश साहू ऊपर ठगी के आरोप लगावत एसपी (SP) ल शिकायत सउंपे रिहिस, जेकर बाद पुलिस ह आरोपी के खिलाफ FIR दर्ज कर ले हे।
बताय जात हे कि आरोपी दिनेश साहू हर साल अपन गांव म पंडित प्रदीप मिश्रा के कथा करवावत रिहिस, जेकर से समिति के मनखे मन ओखर ऊपर भरोसा कर डारिन।
अइसने होइस ठगी के खेल:
समिति ह आरोप लगाय हे कि दिनेश साहू ह कथा कराए बर समिति ले कुल 21 लाख रूपिया नगद ले रिहिस।
कथा के तारीख 8 मई ले 14 मई 2026 तय करे गे रिहिस, लेकिन बाद म पता चलिस कि उही तारीख म पंडित जी के कार्यक्रम झारखंड के रांची म हे।
समिति ह दू किश्त म (5 लाख अउ 16 लाख) रूपिया दिनेश साहू के किराना दुकान म ओला दे रिहिस।
आरोपी ह झूठी तारीख बताके समिति ल गुमराह करिस अउ पोस्टर, बैनर घलो छपवा दे रिहिस।
सीहोर पहुंचे समिति के सदस्य:
जब मामला संदिग्ध लगिस, तब समिति के सदस्य मन सच जाने बर मध्यप्रदेश के सीहोर स्थित कुबेरश्वर धाम पहुंचिन। उहां पंडित प्रदीप मिश्रा के कार्यालय ले पता चलिस कि अंबागढ़ चौकी के कथा बर कोनो रकम जमा नइ करे गे हे। जब समिति ह अपन पइसा वापस मांगिस, त आरोपी ह सिरिफ आश्वासन देवत रिहिस। पुलिस ह अब आरोपी के खिलाफ धारा 318(4) BNS के तहत मामला दर्ज करके जांच शुरू कर दे हे।
