नौकरी के सुनहरा मौका: सीनियर रेजिडेंट के 142 पद मन बर भर्ती, 25 अप्रैल तक कर सकत हो आवेदन
देवघर। एम्स (AIIMS) में नौकरी करके सेवा देय के सपना देखत डॉक्टर मन बर बढ़िया मौका निकल के आई हे। अखिल भारतीय आयुर्विज्ञान संस्थान (एम्स-देवघर) ह सीनियर रेजिडेंट के 142 खाली पद मन ला भरे बर विज्ञापन जारी कर दे हे। जेकर बर 25 अप्रैल तक अर्जी डारे जा सकत हे।
कउन-कउन पद में होही भर्ती
कुल 142 पद मन बर भर्ती होय बर हे, जेमें सबले जादा एनेस्थिसियोलॉजी अउ क्रिटिकल केयर के 26 पद हें। एकर अलावा जनरल सर्जरी के 15, जनरल मेडिसिन के 14, गायनेकोलॉजी के 10, बायोकेमिस्ट्री अउ पीडियाट्रिक्स के 8-8 पद सामिल हें। कार्डियोलॉजी, न्यूरोसर्जरी, अउ रेडियो डायग्नोसिस कस विभाग मन में घलो भर्ती होही।
पढ़ाई अउ उमर
अर्जी डारे बर डॉक्टर मन के तीर कोनो भी मान्यता प्राप्त संस्थान ले पोस्ट-ग्रेजुएशन डिग्री (MD/MS/DNB/MDS) होना जरूरी हे। मनखे के उमर जादा ले जादा 45 साल होना चईये। आरक्षित वर्ग के भाई-बहिनी मन ला नियम के मुताबिक उमर में छूट घलो मिलही।
कतका मिलही पगार अउ कइसने होही चयन
चयनित होय के बाद डॉक्टर मन ला हर महीना 67,700 रुपिया पगार (सैलरी) मिलही, संग में सरकार के कोति ले अउ घलो सुविधा अउ भत्ता दी जाही। चयन बर लिखित परीक्षा या इंटरव्यू अउ डॉक्यूमेंट वेरिफिकेशन करे जाही।
कइसने भरें फॉर्म?
ऑफलाइन: एम्स देवघर के वेबसाइट ले फॉर्म डाउनलोड करके भरव अउ ओला ‘रजिस्ट्रार कार्यालय, 4वां तल, एम्स, देवीपुर, देवघर- 814152’ के पता में डाक ले भेज दव।
ईमेल: फॉर्म अउ सबो जरूरी कागज के एक ठन पीडीएफ फाइल बनाके एम्स के आधिकारिक ईमेल आईडी में घलो भेजना जरूरी हे।
आवेदन फीस: सामान्य वर्ग बर 3,000 रुपिया, ओबीसी/EWS बर 1,000 रुपिया फीस हे। महिला, एससी-एसटी अउ दिव्यांग मन बर कोनो फीस नई लगे।
