पेट्रोल-डीजल के दाम मा सियासत: भूपेश के तंज अउ ओपी चौधरी के पलटवार
Petrol Diesel Price : रायपुर। छत्तीसगढ़ मा पेट्रोल अउ डीजल के एक्साइज ड्यूटी कम करे के बाद अब सियासत गरमा गे हे। पूर्व मुख्यमंत्री भूपेश बघेल ह सोशल मीडिया मा पोस्ट करके भाजपा सरकार ऊपर हमला बोले हे। बघेल ह कहिन कि जेला-जेला ए कटौती ले राहत मिलही, ओ मन मुख्यमंत्री विष्णुदेव साय के सार्वजनिक अभिनंदन करंय अउ जदि राहत नई मिलही त ओ मन ला लानत भेजंय ‘सांय-सांय’।
भूपेश बघेल ह आगू कहिन कि तेल कंपनी मन ला राहत दे बर ये सब करे गे हे अउ चाटुकारिता करे बर जनता ला फायदा मिले के अफवाह उड़ाए जावत हे। असल मा जनता ला एक कौड़ी के घलो राहत नई मिलने वाला हे।
मंत्री ओपी चौधरी ह दीन करारा जवाब
भूपेश बघेल के पोस्ट ऊपर प्रदेश के वित्त मंत्री ओपी चौधरी ह जमके पलटवार करिन। ओ मन कहिन कि अइसने हरक़त के सेती जनता ह लानत भेजके आप मन ला पहिली च सत्ता ले बाहिर कर दे हे। जनता ला गुमराह करे के पहिली आप मन ला अपन इतिहास याद कर लेना चाहिये।
ओपी चौधरी ह कहिन कि जब कोरोना काल मा पूरा दुनिया संकट मा रिहिस, तब आप मन पेट्रोल ऊपर वैट बढ़ाके आपदा ला अवसर बनाय अउ वसूली करे के काम करे रेहेव। आज जब दुनिया मा जुद्ध के स्थिति हे, तब प्रधानमंत्री नरेंद्र मोदी ह देशवासी मन ऊपर बोझ झन पड़े कहिके एक्साइज ड्यूटी कम करे के फैसला लिन हे। आप मन ला तकलीफ ये बात के हे कि जनता ला राहत मिलत हे। ये साफ हे कि कांग्रेस बर आपदा वसूली के मौका रिहिस, फेर मोदी जी बर संकट मा घलो जनता के सेवा करना संकल्प हे।
