ई-श्रम साथी ऐप :अब मजदूर मन ला मोबाइल ले मिलही काम, बिचौलिया मन के खेल खत्म
रायपुर। छत्तीसगढ़ के मिहनतकश भाई-बहिनी मन बर सासन ह एक बढ़िया डिजिटल तोहफा लाये हे। श्रम विभाग ह निर्माण श्रमिक मन ला रोजगार देवाय अउ ओमन ला आर्थिक रूप ले मजबूत बनाय बर ‘ई-श्रम साथी’ (eShram Sathi) मोबाइल ऐप शुरू करे हे। मुख्यमंत्री विष्णुदेव साय के अगुवाई म ‘निर्माण श्रमिक न हो हताश, ई-श्रम साथी ऐप में करे काम की तलाश’ के नारा ला पूरा करे बर ये बड़का कदम उठाय गे हे।
मजदूर मन ला मिलही सीधा काम
ये ऐप के सबसे बड़ फायदा ये हे कि अब मजदूर मन ला काम खोजे बर कोनो दलाल या बिचौलिया के चक्कर काटे के जरूरत नइ पड़े। श्रमिक मन अपन हुनर के हिसाब ले अपन घर के तीर-तखार म ही काम खोज सकिहें। ऐप म जुड़ना बिल्कुल फ्री हे अउ एला चलाना घलो बहुत असान हे। एखर जरिए सासन के सबो सरकारी योजना मन के जानकारी अउ ओखर लाभ घलो सीधा मजदूर मन ला मिलही।
काम देइया मन बर घलो सुविधा
सिर्फ मजदूर मन बर ही नइ, बल्कि जेन मन ला काम बर मजदूर मन के जरूरत हे (नियोक्ता), ओमन बर घलो ये ऐप बड़े काम के हे। ओमन अपन जरूरत के हिसाब ले बढ़िया मिस्त्री या मजदूर खोज सकत हें। विभाग ले जांच-परख करे गे मजदूर मन के जानकारी ऐप म मिलही, जेखर से काम देइया मन के समय अउ पइसा दोनों बांचही।
अइसे करव डाउनलोड
छत्तीसगढ़ भवन एवं अन्य सन्निर्माण कर्मकार कल्याण मंडल ह कहे हे कि सबो पात्र मनखे ये ऐप ला गूगल प्ले स्टोर ले डाउनलोड कर सकत हें। अगर कोनो किसम के दिक्कत आथे त हेल्पलाइन नंबर 0771-3505050 म फोन करके या अपन तीर के श्रम ऑफिस म जाके मदद ले सकत हें।
