इंस्टाग्राम मा अब चैटिंग नई राहय सुरक्षित: 8 मई ले बंद हो जाही ये खास सुरक्षा फीचर, जानव काबर मेटा ह लिस ये फैसला
Instagram Privacy Change : फोटो अउ वीडियो शेयरिंग प्लेटफॉर्म इंस्टाग्राम (Instagram) के यूजर मन बर एक बड़का खबर आए हावे। मेटा कंपनी ह साफ कर दे हे कि आगामी 8 मई 2026 ले इंस्टाग्राम मा ‘एंड-टू-एंड एन्क्रिप्टेड’ (End-to-End Encrypted) चैट के सुविधा ला बंद कर दिये जाही। एकर मतलब ये हे कि अब आप मन के निजी बातचीत पहिली जइसन पूरी तरह सुरक्षित नई रहय। कंपनी ह कम इस्तेमाल के हवाला देवत ये कड़ा फैसला लिस हे।
का होथे ये एन्क्रिप्शन अउ काबर रिहिस जरूरी? एन्क्रिप्शन एक अइसन सुरक्षा सिस्टम आय जेमा मैसेज ला सिर्फ भेजेइया अउ पढ़ेइया (पाने वाला) च पढ़ सकत रहिन। इहाँ तक कि इंस्टाग्राम कंपनी घलो आप मन के मैसेज ला नई पढ़ सकत रिहिस। एला ऑनलाइन प्राइवेसी बर सबसे मजबूत सुरक्षा माने जाथे। अब ए फीचर के हटे के बाद यूजर मन के गोठ-बात पहिली जइसन पूरी तरह निजी (Private) नई रहय।
काबर हटाय जावत हे ये फीचर? इंस्टाग्राम ह ए एन्क्रिप्शन फीचर ला दिसंबर 2023 मा शुरू करे रिहिस। मेटा के सोंच रिहिस कि एला लाय ले प्राइवेसी मजबूत होही, पर अब कंपनी के कहना हे कि बहुत कम यूजर मन ए फीचर के इस्तेमाल करत रहिन। एही पाय के कंपनी ह एला बंद करे के मन बना लिस हे ताकि प्लेटफॉर्म ला दूसर दिशा मा ले जाय जा सके।
यूजर मन ऊपर का असर पड़ही?
-
मैसेज के सुरक्षा: 8 मई 2026 के बाद भेजे गे मैसेज एन्क्रिप्टेड नई राहय, मतलब जरूरत पड़े मा कंपनी ए मैसेज मन ला देख सकत हे।
-
पुराना चैट: जिन मन के पहिली ले एन्क्रिप्टेड चैट हे, ओमन ला नोटिफिकेशन भेजे जाही।
-
सलाह: कंपनी ह कहे हे कि यूजर मन अपन जरूरी मैसेज अउ फोटो-वीडियो ला समय रहत डाउनलोड कर लेवें।
ए फैसला के बाद अब प्राइवेसी ला लेके नवा बहस छिड़ गे हे। एक्सपर्ट मन के कहना हे कि ए फीचर के हटे ले यूजर मन के सुरक्षा मा खतरा बढ़ सकत हे।
