राष्ट्रपति द्रौपदी मुर्मू ह संत प्रेमानंद महाराज ले करिन मुलाकात, अध्यात्म अउ देस सेवा ऊपर होयिस गोठ-बात
President Droupadi Murmu : मथुरा। भारत के राष्ट्रपति द्रौपदी मुर्मू अपन तीन दिन के उत्तर प्रदेश दउरा के बेरा आज कान्हा के नगरी वृंदावन पहुँचीन। यहाँ ओ मन ह प्रख्यात संत श्री प्रेमानंद महाराज के दरसन करिन अउ केली कुंज आश्रम म ओ मन ले खास मुलाकात करिन। राष्ट्रपति ह न केवल महाराज श्री के सत्संग सुनिन, बल्कि ओखर संग ‘एकांतिक गोठ-बात’ (चर्चा) घलो करिन। ये बखत दूनों झन के बीच देस के सांस्कृतिक विरासत, अध्यात्म, निस्वार्थ सेवा अउ जन-कल्याण जइसन गंभीर बिसय मन ऊपर गोठ होयिस।
संत प्रेमानंद महाराज के आभार जतावत राष्ट्रपति ह कहिन कि देस के गौरवशाली संस्कृति ल सहेज के रखे बर अउ समाज ल बने रद्दा दिखाय बर संत समाज के भूमिका बहुतेच जरूरी हे। प्रेमानंद महाराज के दरसन के बाद राष्ट्रपति के अगला पड़ाव उड़िया बाबा आश्रम अउ नीम करोरी बाबा आश्रम रही। एकर संग ओ मन वात्सल्य ग्राम के घलो दउरा करहीं।
राष्ट्रपति के ये दउरा ल लेके मथुरा-वृंदावन म सुरक्षा के तगड़ा इंतजाम करे गे हे। 21 मार्च के गोवर्धन परिक्रमा बर प्रशासन ह पूरा ताकत झोंक दे हे। सुरक्षा म करीब 3,000 पुलिस जवान मन ल तैनात करे गे हे। खास बात ये हे कि वीवीआईपी दउरा के बेरा राष्ट्रपति ल बांदर मन ले बचाय बर प्रशासन ह रद्दा म जगह-जगह लंगूर मन के कटआउट (फोटो) घलो लगाय हे। बुधवार के दिन पुलिस अउ प्रशासनिक अमला ह पूरा रूट म फुल ड्रेस रिहर्सल करके यातायात अउ सुरक्षा व्यवस्था के बारीकी ले जाँच करिन।
