नोवा प्लांट में भारी हादसा : खउलत लोहा गिरे ले चार मजदूर झुलसिन, प्रबंधन ऊपर सुरक्षा में लापरवाही के आरोप

Bilaspur News : बिलासपुर। बिल्हा इलाका के नोवा स्पंज आयरन प्लांट में मंगलवार के रात एक बड़ हादसा हो गे हावय। प्लांट के फर्नेस सेक्शन में काम करत बखत अचानक पिघले हुए लोहा (मोल्टन मेटल) ह मजदूर मन के ऊपर गिर गे, जेकर ले चार कर्मचारी मन बुरी तरह ले झुलस गे हें। ये घटना के बाद प्लांट में हड़कंप मच गे अउ साथी मजदूर मन ह घायला मन ल तुरंत बिलासपुर के एक निजी अस्पताल में भर्ती कराइन।

जानकारी के मुताबिक, रात करीब 1 बजे जब शिफ्ट बदलत रहिस, तब भैंसबोड़ के नरेंद्र कोसले, चंद्रहास अउ बिहार के धर्मवीर अउ विनय कुमार काम करत रहिन। पिघले लोहा ल लैडर में डारत बखत रिंग ह कट गे अउ खउलत लोहा ह छिटक के सिधा मजदूर मन के ऊपर गिरिस। लोहा अतका गरम रहिस कि चारों झुलस के उही ठउर में छटपटाए लगिन। डॉक्टर मन के कहना हे कि मजदूर मन 25 ले 40 प्रतिशत तक झुलस गे हें अउ ओमन के इलाज चलत हे।

घायल मजदूर विनय कुमार ह प्लांट प्रबंधन ऊपर गंभीर आरोप लगावत कहिस कि ओमन ल सुरक्षा बर जरूरी जैकेट, चश्मा अउ ईयर प्लग नई देय गय रहिस। बिना सुरक्षा के ही अतका खतरनाक काम कराय जात रहिस। पुलिस अउ औद्योगिक सुरक्षा विभाग ह अब ये मामला के जांच शुरू कर दे हावय कि आखिर अतका बड़ लापरवाही कइसे होइस।