एसीबी बिलासपुर के बड़े कार्यवाही: स्टेट बैंक के पहिली के कैशियर गिरफ्तार, 2.06 करोड़ रुपिया के गबन के आरोप
बिलासपुर (छत्तीसगढ़): एंटी करप्शन ब्यूरो (ACB) बिलासपुर ह स्टेट बैंक ऑफ इंडिया, शाखा बिल्हा में होय करोड़ों रुपिया के हेराफेरी मामला में बड़े सफलता पाय हे। बैंक ल 2,06,37,600 रुपिया के आर्थिक नुकसान पहुँचाए वाली पहिली के कैशियर श्रीमती तेजवथ थीरापतम्मा ल गिरफ्तार कर ले गे हे। पुलिस ह आरोपी करा ले एक ठन संदिग्ध मोबाइल घलो जप्त करे हे, जेकर ले बड़े खुलासा होय के उम्मीद हे।
मामला के जानकारी: एसबीआई बिल्हा के शाखा प्रबंधक पीयूष बारा ह रायपुर एसीबी मुख्यालय में शिकायत दर्ज कराए रहिस। आरोप हे कि 19 दिसंबर 2024 ले 02 जनवरी 2025 के बीच में कैशियर तेजवथ ह दूसर कर्मचारी मन के संग मिल के अपन पद के दुरुपयोग करिस अउ बैंक रिकॉर्ड अउ खाता मन में छेड़छाड़ करके करीब 2.06 करोड़ रुपिया के गबन करिस। ए शिकायत के आधार में 19 जनवरी 2026 को भ्रष्टाचार निवारण अधिनियम अउ बीएनएस के धारा मन के तहत अपराध दर्ज करे गे रहिस।
जाँच अउ गिरफ्तारी: विभागीय जाँच में घलो कैशियर तेजवथ ल दोषी पाय गे रहिस। आरोपी कैशियर जून 2025 ले सस्पेंड चलत रहिस अउ अभी आरबीओ जगदलपुर में अटैच होय के बाद घलो ड्यूटी ले गायब रहिस। मुखबिर के सूचना में एसीबी बिलासपुर के टीम ह 26 फरवरी 2026 के आरोपी ल बिल्हा बैंक के करा ले घेराबंदी करके पकड़िस।
गबन के तरीका: जाँच में पता चलिस हे कि कैशियर ह गबन करे रुपिया ल कई लोगन के खाता में भेज दे रहिस। ए धोखाधड़ी ल लुकाए बर बैंक के रिकॉर्ड में ए खरचा ल खाय-पिए, किराया अउ रख-रखाव के मद में देखा दे रहिस। आरोपी मूल रूप ले खम्मम (आंध्र प्रदेश) के रहइया हे। अभी गिरफ्तार आरोपी ल विशेष न्यायालय बिलासपुर में पेश करके रिमांड ले के तैयारी करे जात हे।
