CG Government Jobs : अब हर साल तय तारीख मं निकरही भर्ती, नवा नियम लागू
CG Government Jobs : रायपुर। छत्तीसगढ़ सरकार ह तृतीय अऊ चतुर्थ श्रेणी के सरकारी नौकरी के भरती प्रक्रिया ला अउ ज्यादा पारदर्शी, समयबद्ध अऊ तकनीक आधारित बनाय बर छत्तीसगढ़ कर्मचारी चयन मंडल नियम-2026 लागू कर दिस हे। सामान्य प्रशासन विभाग के अधिसूचना के मुताबिक, राजपत्र मं प्रकाशित होवत ही नवा नियम लागू होगे हें।
अब तृतीय अऊ चतुर्थ श्रेणी के जम्मो भर्ती प्रक्रिया पूरी तरह ऑनलाइन होही। अभ्यर्थी मन ला आवेदन करे बर आधार प्रमाणीकरण, प्रोफाइल पंजीयन अऊ ऑनलाइन आवेदन करना जरूरी होही। एखर संग-संग एमसीक्यू आधारित परीक्षा, मेरिट के आधार मं चयन, डिजिटल दस्तावेज सत्यापन अऊ समय सीमा मं नियुक्ति के व्यवस्था घलो लागू करे गे हे।
आधार प्रमाणीकरण अऊ ऑनलाइन आवेदन जरूरी
नवा नियम के मुताबिक, आवेदन करे के पहिली हर अभ्यर्थी ला आधार के माध्यम ले अपन पहचान सत्यापित करके प्रोफाइल बनाना होही। आवेदन भरत बखत उम्मीदवार मन ला अपन पसंद के पद, विभाग अऊ नियुक्ति प्राधिकारी के जानकारी देना होही। एक बार विकल्प भर देय के बाद ओकर बदलाव नई हो सकही।
एमसीक्यू आधार मं होही परीक्षा
अब भर्ती परीक्षा बहुविकल्पीय सवाल (MCQ) के आधार मं ली जाही। परीक्षा के बाद मॉडल उत्तर (Answer Key) जारी होही अऊ अभ्यर्थी मन ला आपत्ति दर्ज करे के मौका मिलही। आपत्ति के निराकरण के बादे अंतिम परिणाम घोषित करे जाही।
कौशल अऊ शारीरिक परीक्षा बर नवा नियम
जेन पद मन मं कौशल परीक्षा या शारीरिक दक्षता परीक्षा जरूरी होही, ओमन मं लिखित परीक्षा के मेरिट के आधार मं विज्ञापित पद के संख्या के 15 गुना अभ्यर्थी ला अगला चरण बर बुलाय जाही। संबंधित विभाग ला तीन महीना के भीतर ए परीक्षा पूरा करना जरूरी होही।
अब वेटिंग लिस्ट नई बनही
नवा नियम के सबसे बड़े बदलाव मं अब अंतिम चयन सूची जारी होय के बाद वेटिंग लिस्ट या रिजर्व सूची नई निकाली जाही। चयनित अभ्यर्थी मन ला 15 दिन के भीतर आधार प्रमाणीकरण अऊ जरूरी दस्तावेज ऑनलाइन जमा करना होही। दस्तावेज सही पाए जाए के बाद नियुक्ति पत्र जारी होही। नियुक्ति मिलय के 30 दिन के भीतर जॉइन करना जरूरी होही, नइ त पद खाली माने जाही।
हर साल अगस्त मं जारी होही परीक्षा कैलेंडर
अब कर्मचारी चयन मंडल हर साल अगस्त महीना मं तृतीय अऊ चतुर्थ श्रेणी के भर्ती परीक्षा के वार्षिक कैलेंडर जारी करही। एखर संग व्यावसायिक, शैक्षणिक अऊ पात्रता परीक्षा मन के संभावित कैलेंडर घलो प्रकाशित करे जाही, ताकि अभ्यर्थी मन समय रहते तैयारी कर सकंय।
भर्ती प्रक्रिया होही अउ ज्यादा पारदर्शी
सरकार के कहना हे कि नवा नियम ले सरकारी भर्ती प्रक्रिया अउ ज्यादा पारदर्शी, निष्पक्ष अऊ समयबद्ध बनही। ऑनलाइन आवेदन, डिजिटल दस्तावेज जांच, एमसीक्यू परीक्षा अऊ तय समय सीमा मं चयन अऊ नियुक्ति ले अभ्यर्थी मन ला सुविधा मिलही अऊ भर्ती प्रक्रिया मं पारदर्शिता बढ़ही।
