महिला आरक्षण बिल गिरे के विरोध मा भाजपा के प्रदर्शन: CM साय कहिन – एक दिन के विशेष सत्र बुलाबो
Women Reservation Bill : रायपुर। लोकसभा मा महिला आरक्षण बिल पास नई होय के विरोध मा भाजपा ह आज रायपुर मा जनआक्रोश रैली निकालिस। ए मउका मा मुख्यमंत्री विष्णुदेव साय ह विपक्ष ऊपर निशाना साधत कहिन कि विधानसभा मा एक दिन के विशेष सत्र बुलाय जाही, जिहां विपक्ष के ए रवैया के खिलाफ निंदा प्रस्ताव पास करे जाही।
भाजपा महिला मोर्चा के जनआक्रोश यात्रा बलबीर जुनेजा इंडोर स्टेडियम ले सुरु होके सुभाष स्टेडियम पहुंचीस, जिहां एक बड़े सभा के आयोजन करे गे रिहिस। रैली के बारे मा गोठियावत CM साय ह कहिन कि प्रधानमंत्री नरेंद्र मोदी ह पद संभाले के बाद ले लगातार महिला मन के मान-सम्मान ल बढ़ाए हें। ‘बेटी पढ़ाओ बेटी बचाओ’ अभियान ले लेके देस के सबले बड़े पद राष्ट्रपति मा एक महिला ल बइठार के नारी शक्ति के सम्मान करे गे हे।
CM ह आगू कहिन कि देस के विकास बर महिला मन ल 33 प्रतिशत आरक्षण देना रिहिस, फेर विपक्षी पार्टी मन एला पास नई होवन दीन। एखर ले देस के 70 करोड़ महिला मन के संग छल करे गे हे। आज रायपुर के सड़क मा महिला मन के भारी आक्रोश देखन ल मिलिस, अउ हम मन घलो ओखर संग खड़े हन। ए जनआक्रोश यात्रा मा मुख्यमंत्री विष्णुदेव साय के संग प्रदेश अध्यक्ष किरण देव, डिप्टी सीएम अरुण साव, कैबिनेट मंत्री लक्ष्मी राजवाड़े, सांसद रूपकुमारी चौधरी, कमलेश जांगड़े, लक्ष्मी वर्मा अउ कतको झन पदाधिकारी अउ कार्यकर्ता मन सामिल रिहिन।
