वोटर लिस्ट मं छूटे अउ पहिली बार वोट देय वाले मन के जुड़ही नांव, BLO घर-घर जाहीं
Voter List Special Drive Chhattisgarh : रायपुर। मतदाता सूची मं छूट गे पात्र मतदातामन, पहिली बार वोट देय वाले युवा मन अउ अब तक सूची मं नांव दर्ज नइ कराय नागरिक मन के नांव जोड़े बर विशेष अभियान चलाय जाही। ए अभियान के तहत बूथ लेवल ऑफिसर यानी BLO घर-घर जाके मतदातामन के जानकारी के सत्यापन करहीं। पात्र पाए गे मतदातामन के नांव मतदाता सूची मं जोड़वाय बर फॉर्म-6 भराय मं मदद घलो करहीं।
पुराना अउ अभी के वोटर लिस्ट के होही मिलान
अभियान के तहत BLO मन प्री-SIR मतदाता सूची के तुलना अभी के मतदाता सूची ले करहीं। ए दौरान अइसन मतदातामन के पहचान करे जाही, जेनकर नांव पहिली के सूची मं रहिस, फेर अभी के सूची मं नइ हे। ए मतदातामन के अलग सूची बनाके घर-घर जाके उनकर वर्तमान स्थिति के जानकारी जुटाय जाही।
पात्र मिलिस त फॉर्म-6 ले जुड़ही नांव
घर-घर सत्यापन के दौरान पात्र पाए गे मतदाता मन के नांव जोड़वाय बर फॉर्म-6 भराय जाही। BLO मन ला एक हफ्ता मं कम से कम 20 से 25 मतदातामन तक पहुंचे के लक्ष्य देय गे हे, ताकि ए पूरा प्रक्रिया करीब एक महीना मं पूरा करे जा सके।
ए दौरान BLO मन छूटे गे पात्र मतदातामन के संग पहिली बार वोट देय के पात्र युवा मन अउ अइसन नागरिक मन के नांव घलो जोड़वाहीं, जेनकर नांव अब तक मतदाता सूची मं दर्ज नइ हो पाय हे।
बूथ स्तर मं लगही विशेष शिविर
नांव जोड़वाय बर बूथ स्तर मं विशेष शिविर घलो आयोजित करे जाही। रैन बसेरा, मजदूर बस्ती, बेघर अउ वंचित वर्ग के लोगन तक पहुंचे बर अलग शिविर लगाय के व्यवस्था रखे गे हे। ए अभियान के प्रचार-प्रसार जागरूकता कार्यक्रम के माध्यम ले करे जाही, ताकि पात्र नागरिक मन ला नांव जुड़वाय के मौका मिल सके।
BLO मन अपन सत्यापन के सूची, भरे गे फॉर्म-6 अउ क्षेत्रीय जांच रिपोर्ट संबंधित निर्वाचक पंजीयन अधिकारी यानी ERO ला सौंपहीं। बूथवार सूची मान्यता प्राप्त राजनीतिक दल के बूथ लेवल एजेंट मन संग घलो साझा करे जाही। अभियान के प्रगति के नियमित समीक्षा मुख्य निर्वाचन अधिकारी, जिला निर्वाचन अधिकारी अउ ERO स्तर ले करे जाही।
