वेदांता पावर प्लांट हादसा; मरने वाले मन के संख्या 23 होय गे हे, 12 घायल मन के इलाज जारी
Vedanta Power Plant : सक्ती। वेदांता पावर प्लांट में 14 अप्रैल के होय बायलर ब्लास्ट में मरे वइया मनखे मन के संख्या बढ़ के अब 23 हो गे हे। अभी घलो 12 घायल श्रमिक मन के अलग-अलग अस्पताल में इलाज चलत हे।
पिछला 12 घंटा के भीतर मौत के आंकड़ा 20 ले बढ़ के 23 पहुंच गे हे। ये नवा मरे वइया मन में पश्चिम बंगाल के सुब्रतो जेना, उत्तर प्रदेश के किस्मत अली अउ एक अऊ श्रमिक सामिल हें। ये बड़े हादसा में जान गंवाए वइया मन में 5 झन हमर छत्तीसगढ़ के हें, अउ बाकी 18 झन दूसर राज्य के रहने वइया हें।
पुलिस ह ये मामला में वेदांता ग्रुप के चेयरमैन अनिल अग्रवाल अउ प्लांट हेड देवेंद्र पटेल समेत 19 लोगन मन के खिलाफ FIR दर्ज कर ले हे। सक्ती एसपी प्रफुल्ल ठाकुर ह बताइस कि एएसपी के अगुवाई में एक खास जांच टीम (SIT) बनाए गे हे, जेमा फोरेंसिक एक्सपर्ट घलो सामिल हें।
जांच में ये बात आगू आई हे कि बायलर के फर्नेस में जरूरत ले जादा ईंधन जमा हो गे रिहिस, जेकर ले दबाव बढ़ गे अउ पाइप ह अपन जगह ले हट गे, जेकर से ये भयानक विष्फोट होइस। सुरक्षा अउ रख-रखाव में भारी लापरवाही के सेती ये हादसा होय के बात कहे जावत हे।
मुख्यमंत्री विष्णुदेव साय ह ये घटना के मजिस्ट्रियल जांच के आदेश दे हें। सरकार डाहर ले मृतक मन के परिवार ला 5-5 लाख अउ घायल मन ला 50-50 हजार रुपिया दे के घोषणा करे गे हे। PMO डाहर ले घलो सहायता राशि के ऐलान करे गे हे। उहें, वेदांता प्लांट प्रबंधन ह मृतक मन के परिवार ला 35-35 लाख रुपिया अउ नौकरी, अउ घायल मन ला 15-15 लाख रुपिया दे के बात कहे हे।
