बड़ दुर्घटना: उरला के 3D फैक्ट्री म भयंकर ब्लास्ट, 3 मजूदूर मन के मौत, कतकोन घायल
Urla Factory Blast : रायपुर। राजधानी रायपुर के उरला थाना इलाका के बेंद्री म बने 3D फैक्ट्री म मंगलवार के दिन एक बड़ अउ दर्दनाक हादसा होगे। फैक्ट्री म भयंकर ब्लास्ट (धमाका) होय से 3 मजदूर भाई मन के मऊत होगे हे, अउ कतकोन जन घायल बताए जात हें। धमाका अतका जबर रहीस कि फैक्ट्री म अफरा-तफरी मच गे।
ऑक्सीजन सिलेंडर फटे से होइस हादसा
मिले जानकारी के मुताबिक, ये हादसा ऑक्सीजन सिलेंडर के फटे की सेती होइस। धमाका होय के तुरंत बाद उरला थाना पुलिस अउ बड़े अधिकारी मन मौका म पहुंच गीन। राहत अउ बचाव के काम तेजी से चलत हे, फायर ब्रिगेड अउ SDRF के टीम घलो मौका म तैनात हे। घायल मन ला इलाज बर अस्पताल पहुंचाए गए हे।
मृतक मन के पहचान:
-
लाल सिंह: डिंडौरी (मध्य प्रदेश) के रहने वाला, मौका म मऊत।
-
अरुण पांडे: जांजगीर-चांपा (छत्तीसगढ़) के रहने वाला, मौका म मऊत।
-
कमल सिंह: डिंडौरी (मध्य प्रदेश) के रहने वाला, अस्पताल ले जात बखत दम तोड़ीस।
फैक्ट्री प्रबंधन नदारद
हादसा के बाद ले फैक्ट्री परिसर के चारों मुड़ा सुरक्षा बढ़ा दिए गए हे। बड़ दुख के बात आय कि अतका बड़ हादसा होय के बाद घलो फैक्ट्री प्रबंधन के कोनो घलो जिम्मेदार अधिकारी मौका म नइ दिखिन। पुलिस अउ जांच टीम पूरा मामला के छानबीन म जुटे हे।
