3D ब्लास्ट अपडेट: मुख्यमंत्री के बड़े कार्रवाई, उरला के फैक्ट्री सील; मृतक मन के परिवार ला 30-30 लाख के मुआवजा के घोषणा
Urla 3D Factory Blast Update : रायपुर। छत्तीसगढ़ के राजधानी रायपुर के उरला औद्योगिक इलाका से एक जन कँपकँपा देवे वइसन दुखद खबर आगू आए हे। उहाँ के ‘थ्री डी’ (3D) फैक्ट्री में एक ठन बड़ भारी ब्लास्ट (धमाका) होगे, जेकर से काम करत 3 मजदूर भाई मन के मउका म च मौत होगे। ए दुर्घटना के बाद सरकार ह कड़ा कदम उठावत फैक्ट्री ला तुरंत सील (बंद) करवा दे हे।
कइसे होय रीहिस ये हादसा?
शुरुआती जांच में पता चले हे कि उरला के ए फैक्ट्री में फेरो अलॉय (Ferro Alloys) बनाए के काम होवत रीहिस। मंघलवार के संझा कनी करीबन 6 बजे फैक्ट्री के भट्टी (फर्नेस) करा लांसिंग के काम चलत रीहिस, तभे अचानक ऑक्सीजन सिलेंडर ह भभक गे अउ ओमां बड़ भारी धमाका होगे। ए ब्लास्ट एतका जबर रीहिस कि पूरा फैक्ट्री ह हिल गे।
मुख्यमंत्री साय अउ उद्योग मंत्री ह जताइस दुख
ए बड़ दुर्घटना ला लेके मुख्यमंत्री विष्णुदेव साय ह गहिर दुख जताए हें। ओमन कहिन:
“हादसा के पता चलत च फैक्ट्री ला पूरी तना से बंद करवा दे गे हे। मृतक मन के परिवार ला पूरा मुआवजा दिया जावत हे। आगू अइसन अउ कतहु झन होवय, एकर बर सबो उद्योग मन में सुरक्षा के नियम मन ला कड़ाई से पालन करवाए जाही।”
उहंचे, राज के उद्योग मंत्री लखन लाल देवांगन ह घलो ए घटना ला बड़ दुखद बताए हें। ओमन कहिन कि ए पूरा मामला के जांच के आदेश दे दे गे हे। जांच के रिपोर्ट आए के बाद जेकर घलो गलती निकलही, ओला छोड़े नहीं जाय, ओकर ऊपर कड़ा कारवाही करे जाही।
पीड़ित परिवार मन ला 30-30 लाख के मदद
प्रशासन अउ उद्योग मंत्री के कहे के बाद, कारखाना प्रबंधन ह पीड़ित परिवार मन बर आर्थिक मदद के गोठ कहे हे। हादसा में जान गंवाए वाले तीनों मजदूर मन के परिवार ला 30-30 लाख रुपिया के मुआवजा दिए जाही। संग म जेमन घायल हें, ओमन के इलाज के घलो पूरा ब्यवस्था करे जात हे।
