हर महीना कटत हे पइसा? ए हावे UPI AutoPay बंद करे के आसान तरीका
how to stop upi autopay : आज के डिजिटल जमाना म जम्मो मनखे अपन रोज के खरचा बर UPI ऐप के परयोग करथें। बिजली, पानी, गैस, मोबाइल रिचार्ज, इंटरनेट या OTT प्लेटफॉर्म, हर चीज के पेमेंट अब ऑनलाइन होगे हे। अइसन म बार-बार बिल भरे के झंझट ले बांचे बर UPI AutoPay के सुबिधा सुरू करे गे हे, जेहा तय तारीख म अपन-आप पइसा काट लेथे। सुने म ए फीचर ह बहुते आसान अउ सुबिधाजनक लगथे, फेर कतको बार एही सुबिधा ह परेशानी बन जाथे। अक्सर मनखे मन कोनो ऐप के फ्री ट्रायल लेय के बखत ऑटो पे चालू कर देथें। बाद म ओ सर्विस के इस्तेमाल बंद कर देथें, फेर AutoPay बंद करे बर भुला जाथें। एखर नतीजा ए होथे कि हर महीना बिना जानकारी के पइसा कटत रहिथे।
असल म सिर्फ ऐप ला डिलीट करे ले ऑटो पेमेंट बंद नई होवय। जब तक आप मन खुद जाके ओ सर्विस के ऑटो पे मैंडेट कैंसिल नई करहौ, तब तक पइसा कटत राही। एखर बर बखत-बखत म ए चेक करना जरूरी हे कि कहूँ कोनो अनचाहा सब्सक्रिप्शन तो चालू नई हे। अब सवाल ए हे कि AutoPay ला बंद कइसन करे जाय? नीक बात ए हे कि जम्मो बड़े UPI ऐप म एला बंद करे के तरीका बहुते आसान हे।
PhonePe म अइसन करव बंद अगर आप मन PhonePe इस्तेमाल करथौ, त ऐप खोल के अपन प्रोफाइल म जाव। ओहां Payment Management या AutoPay के विकल्प मिलही। ए सेक्शन म आप मन ला जम्मो चालू ऑटो पे सर्विस मन दिखही। जे सर्विस ला बंद करना हे, ओखर ऊपर क्लिक करव। इहां आप चाहौ त एला थोरकिन दिन बर रोक सकथौ या पूरा तरीका ले डिलीट कर सकथौ।
Paytm यूजर्स बर टिप्स अइसने Paytm यूजर्स घलो आसानी ले AutoPay बंद कर सकथें। एखर बर ऐप के प्रोफाइल सेक्शन म जाके UPI Settings खोलव। फेर Automatic Payments या Payment Management विकल्प म जाव। इहां ले जे घलो पेमेंट ला रोकना हे, ओला चुनव अउ कैंसिल कर दव।
Google Pay वाले करव ए काम अगर आप मन Google Pay के इस्तेमाल करथौ, त ऐप म ‘You’ टैब म जाव। एखर बाद AutoPay सेक्शन खोलव अउ ‘Live’ म जाके चालू सर्विस मन ला देखव। जे सर्विस ले पइसा कटत हे, ओला चुन के ‘Cancel AutoPay’ म क्लिक करव अउ UPI PIN डाल के कन्फर्म कर दव।
धियान रखे के बात ए हे कि AutoPay फीचर आप मन के सुबिधा बर हे, फेर बिना देख-रेख के एहा आप मन के खरचा ला बढ़ा सकथे। एखर बर बखत-बखत म अपन AutoPay सेटिंग्स जरूर चेक करव। एखर ले आप मन अनचाहा खरचा ले बांच सकथौ अउ अपन पइसा ऊपर नीक नियंत्रण रख सकथौ।
