इसरो के सैटेलाइट ले बड़े खुलासा: टाइगर रिजर्व म 106 हेक्टेयर जमीन म कब्जा, 166 आरोपी मन ल होही जेल
Udanti Sitanadi Tiger Reserve : गरियाबंद। गरियाबंद जिला के देवभोग इलाका म बसे उदंती-सीतानदी टाइगर रिजर्व म कब्जा अउ अवैध कटाई के एक बड़ भारी मामला आगू आए हे। साल के रुख मन ला बचाए बर साल 1974 म जेला अभ्यारण्य बनाए गे रिहिस, ओही इलाका म कब्जाधारी मन ह 106 हेक्टेयर म फैले करीब 1 लाख रुख मन ला काट डारिन। इसरो के सैटेलाइट ले ये खुलासा होए के बाद अब विभाग ह बड़ कार्रवाई के तैयारी म हे।
इसरो के CARTOSAT सैटेलाइट इमेजरी अउ ड्रोन सर्वे ले मिले डिजिटल सबूत मन ले पता चलीस कि सीतानदी रेंज के जैतपुरी गांव के 166 मनखे मन ह बीते 15 साल म लगभग 265 एकड़ (106 हेक्टेयर) जंगल के जमीन म कब्जा कर ले हें। उदंती-सीतानदी अभ्यारण्य के उपनिदेशक वरुण जैन ह बताइन कि टीम ह जांच शुरू कर दे हे। साक्ष्य ला लुकाए बर कब्जाधारी मन ह रुख के ठूंठ मन ला आग लगा दे रिहिन, ओकर घलो पंचनामा करे जावत हे।
जांच म ये घलो पता चलीस कि ये सबो आरोपी मन करा राजस्व विभाग के खुद के जमीन हे, ओकर बाद घलो लालच म आके जंगल के जमीन ला हड़प ले हें। वन विभाग ह जैतपुरी के 106 मनखे मन ला आरोपी बनाके नोटिस थमा दे हे। वाइल्डलाइफ एक्ट अउ लोक संपत्ति क्षति अधिनियम के तहत ये आरोपी मन ला 7 साल तक के जेल हो सकत हे अउ कब्जा करके कमाए संपत्ति ला घलो कुर्क (अटैच) करे जाही। वरुण जैन ह कहिन कि बेदखली के बाद ओ जगह म फेर ले पौधा लगाए जाही ताकि जंगल के हरियाली ह वापस आ सके।
