राज्यसभा सीट बर लक्ष्मी वर्मा के चयन, मुख्यमंत्री विष्णु देव साय के सिफारिस मा हाईकमान ह लगाइस मुहर…
रायपुर | 03 मार्च 2026 : छत्तीसगढ़ मा खाली होवइया राज्यसभा सीट बर भारतीय जनता पार्टी ह अपन वरिष्ठ महिला नेत्री लक्ष्मी वर्मा ला उम्मीदवार बनाय हे। बताय जावत हे कि मुख्यमंत्री विष्णु देव साय ह ओखर नाम के सिफारिस करे रहिन, जेखर ऊपर भाजपा हाईकमान ह मुहर लगा दीस हे। लक्ष्मी वर्मा के चयन ले भाजपा ह महिला अउ जमीनी कार्यकर्ता मन ला एक बड़े संदेस देय के कोसिस करे हे।
म़ुड़पार ले दिल्ली तक के राजनीतिक सफर
बलौदाबाजार जिला के सिमगा ब्लॉक मा ग्राम मु़ड़पार के रहइया लक्ष्मी वर्मा ह साल 1990 ले भाजपा मा सक्रिय हें। ओखर राजनीतिक सफर बहुत लंबा अउ संघरस भरा हे:
सुरुवात: साल 2000 मा रायपुर सांसद रमेश बैस के सांसद प्रतिनिधि नियुक्त होइन।
संगठन मा पद: 2001 ले 2005 तक महिला मोर्चा मा काम करिन। ओकर बाद 2010 ले 2022 तक महिला मोर्चा कार्य समिति के सदस्य अउ भाजपा के प्रदेश उपाध्यक्ष (2021-2025) घलो रहिन।
प्रभारी के जिम्मेदारी: गरियाबंद संगठन प्रभारी अउ भाजपा मीडिया प्रवक्ता के घलो जिम्मेदारी सम्हालिन।
नगर निगम ले महिला आयोग तक
लक्ष्मी वर्मा ह न केवल संगठन मा बल्कि संवैधानिक पद मन मा घलो अपन लोहा मनवाय हें:
1994: रायपुर नगर निगम मा वार्ड नं. 07 ले पार्षद चुनी गे रहिन।
2010: रायपुर जिला पंचायत के अध्यक्ष निर्वाचित होइन।
2024: वर्तमान मा छत्तीसगढ़ राज्य महिला आयोग के सदस्य के पद सम्हालत हें।
केंदर सरकार मा काम: साल 2019 मा स्टील मिनिस्ट्री (भारत सरकार) मा स्वतंत्र निदेशक के रूप मा घलो काम करे हें।
समाज अउ मजदूर मन बर घलो करे हें काम
लक्ष्मी वर्मा के पहचान केवल राजनीति तक सीमित नई हे। ओ मन ‘मनवा कुर्मी समाज’ मा बहुत बड़े पैठ रखथें अउ समाज के महिला अध्यक्ष घलो रह चुके हें। एकर संग-संग ओ मन मजदूर यूनियन के प्रधान संरक्षक अउ छत्तीसगढ़ स्काउट गाइड के उपाध्यक्ष घलो हें। नेहरू युवा केन्द्र रायपुर डहार ले ओ मन ला ‘जिला युवा पुरस्कार’ ले घलो सम्मानित करे गे हे।
लक्ष्मी वर्मा के राज्यसभा जाय ले छत्तीसगढ़ के कुर्मी समाज अउ महिला मन ला राजनीति मा एक ठन नवा अउ मजबूत आवाज मिलही।
