6 अप्रैल ले बदल जाही पासपोर्ट दफ्तर के पता, अब तेलीबांधा म मिलही हाईटेक सुविधा
रायपुर। छत्तीसगढ़ के राजधानी रायपुर म पासपोर्ट बनवाए वाले मन बर एक जरूरी खबर हे। पासपोर्ट सेवा केंद्र अब तेलीबांधा म सिफ्ट होय बर जावत हे। अभी तक ये केंद्र ह श्याम प्लाजा म चलत रहिस, फेर कम जगह होय के सेती अब एला नवा जगह ले जाए के फैसला करे गे हे। आधुनिक सुविधा मन ले लैस ये नवा केंद्र तेलीबांधा के ‘वन हाई स्ट्रीट कॉम्प्लेक्स’ के दूसरा मंजिल (सेकेंड फ्लोर) म बनाए जावत हे।
क्षेत्रीय पासपोर्ट अधिकारी बीएस राणा के मुताबिक, 6 अप्रैल ले जम्मो सेवा मन ह ये नवा दफ्तर ले ही संचालित होही। ए तारीख के बाद जउन मन घलो ऑनलाइन अपॉइंटमेंट लेहीं, ओ मन ला नवा पता म ही पहुंचे बर पडही। संगे-संग पुराना रुके हुए आवेदन मन के निपटारा घलो इही नवा ऑफिस म करे जाही। अधिकारी मन के कहना हे कि नवा केंद्र म गाड़ी खड़ा करे बर (पार्किंग), बइठे के बढ़िया व्यवस्था अउ हाईटेक सिस्टम मिलही। ए बदलाव ले रायपुर के साथे-साथ भिलाई, बिलासपुर अउ महासमुंद ले आए वाले लोगन मन ला घलो बने सुविधा होही।
नई बदलही डीडी नगर के पासपोर्ट दफ्तर बता दन कि डीडी नगर वाला पासपोर्ट दफ्तर ह अपन पहिली वाला जगह ले ही चलत रहिही। ओ दफ्तर ले जुड़े जम्मो काम उही पता म होही। पासपोर्ट सेवा केंद्र के संचालन ह टीसीएस (TCS) कंपनी करथे। जम्मो प्रक्रिया पूरा होय के बाद डीडी नगर के पासपोर्ट दफ्तर ले छत्तीसगढ़ पासपोर्ट अधिकारी के दस्तखत ले पासपोर्ट ह स्पीड पोस्ट के जरिए मनखे मन के घर तक पहुंचाए जाथे।
