तिल्दा के बेटी के कमाल, 23 के उमर में पास करिस 19 परीक्षा, राष्ट्रपति करिहें गोल्ड मैडल से सम्मानित
तिल्दा के बेटी के कमाल, 23 साल के उमर में दिल्ली पुलिस से लेके रेलवे तक पास करिस 19 एक्जाम, अब चारु पांडेय ला राष्ट्रपति ह गोल्ड मैडल से करिहें सम्मानित
Success Story : रायपुर। छत्तीसगढ़ के बेटी अउ तिल्दा के रहइया चारु पांडेय ह सिरिफ़ 23 साल के उमर में दिल्ली पुलिस से लेके रेलवे तक के 19 थन परीक्षा मन ला बड़े आराम से पास कर डारिस हे। अभी के समय में CAG विशाखापट्नम में ऑडिट ऑफिसर के पद पर काम करत चारु पांडेय ला आघू आवइया स्वतंत्रता दिवस के मउका में राष्ट्रपति द्रौपदी मुर्मू ह गोल्ड मैडल देके सम्मानित करिहें।
चारु पांडेय के उमर भले छोटे हे, पर ओकर सफलता के उड़ान अकास ले ऊंच हे। प्रवीण कुमार पांडेय अउ सुधा पांडेय के बेटी ह 23 साल के उमर में SSC CGL, SSC CHSL, SSC MTS, IBPS (PO), SSC (GD), SSC CPO, NET-JRF, SBI Clerk, CGTET, RRB Group D, RRB NTPC, CG SI, DELHI POLICE, CG NHM, Transport Sub inspector, SSC CGL (2023), SSC CHSL (2023), SSC MTS (2023) अउ RRB group D (2023) जइसन बड़े-बड़े एक्जाम ला पास करके एक नवा मिसाल बनाय हे।
चारु ह मई 2025 में CAG चेन्नई में असिस्टेंट ऑडिट ऑफिसर (AAO) के रूप में पदस्थ होय रीहिस। ओकर बढ़िया काम ला देखत हुए तमिलनाडु सरकार ह ओला 2026 के बेस्ट AAO के पुरस्कार घलो दीस। एकरे बाद 27 जनवरी के प्रमोशन पाके ओहा अभी CAG विशाखापट्नम में ऑडिट ऑफिसर के तौर पर काम करत हे। चारु पांडेय के इही गजब के प्रतिभा ला देखत हुए आघू आवइया स्वतंत्रता दिवस के दिन राष्ट्रपति द्रौपदी मुर्मू ह ओला गोल्ड मैडल से नवाजिहें।
