सितार गुटखा के मालिक गुरमुख जुमनानी ऊपर 317 करोड़ के जुर्माना, जीएसटी विभाग के बड़ कार्रवाई

Durg News : दुर्ग। छत्तीसगढ़ जीएसटी विभाग ह गुटखा किंग गुरमुख जुमनानी ऊपर भारी-भरकम 317 करोड़ रुपिया के जुर्माना ठोक दे हवय। जुमनानी पिछले 5 बछर ले ‘सितार’ नाम के गुटखा बनाके पूरा प्रदेश मा बेंचत रहिस। बता दन कि तंबाखू वाला सितार गुटखा पूरी तरह ले प्रतिबंधित हवय, एखरे सेती विभाग ह 5 बछर के गणना करके ए टैक्स अउ पेनल्टी के राशि तय करे हवय।

Durg News : जीएसटी अधिकारी मन बताइन कि जुमनानी ह बड़े प्लानिंग के साथ ए धंधा ला चलात रहिस। ओकर ददा ह मनखे मन ले गोदाम बर रेंट एग्रीमेंट करत रहिस अउ उहिने गुटखा के पैकिंग होवत रहिस। जांच मा कतको पुराना कागजात घलो बरामद होय हवय। गुटखा के फार्मूला बनाय वाला दीपक पांडे ह बताइस कि एक मिनट मा मशीन ले 250 पैकेट तैयार होवत रहिस अउ रोज के 50 बोरा गुटखा बाजार मा खपाय जात रहिस।

जुलाई 2025 मा जब जीएसटी ह जोरातराई अउ गनियारी मा छापा मारिस, तब पता चलिस कि असली खेल तो राजनांदगांव मा चलत हवय। गुरमुख के बेटा सागर के ‘कोमल फूड’ नाम के फैक्ट्री मा गुटखा के कच्चा माल तैयार होवत रहिस, जबकि कागजात मा ओहा सिर्फ मीठी सुपारी बनाय बर रजिस्टर्ड रहिस। रात के 10 बजे ले सुबह 7 बजे तक चोरी-छिपे ए काम ला करे जात रहिस।

अचरज के बात ए हवय कि जब खाद्य विभाग ह फैक्ट्री ला सील करिस, तब जुमनानी ह टीन शेड ला तोड़के मशीन अउ बाकी सामान ला निकाल लिस। गुरमुख अभी जेल मा बंद हवय अउ ओकर जमानत याचिका घलो टल गे हवय। अधिकारी मन के कहना हे कि पुलिस अउ खाद्य विभाग ले जानकारी लीक होय के सेती ओला पकड़े मा कतको दिन लग गे रहिस।