सेक्स सीडी कांड : सेशन कोर्ट के फैसला के खिलाफ हाई कोर्ट जाही पूर्व मुख्यमंत्री भूपेश बघेल
रायपुर, 27 जनवरी 2026/ छत्तीसगढ़ के बहुचर्चित सेक्स सीडी कांड म रायपुर सेशन कोर्ट डहर ले फिर से ट्रायल सुरू करे के फैसला सुनाए गे हे। ए फैसला के खिलाफ अब पूर्व मुख्यमंत्री भूपेश बघेल हाई कोर्ट जाही। बता दन कि एखर पहिली मार्च 2025 म सीबीआई के विशेष अदालत ह भूपेश बघेल ल जम्मो आरोप ले बरी कर दे रहीस, जेखर खिलाफ सीबीआई ह सेशन कोर्ट म रिव्यू पिटिशन (पुनर्विचार याचिका) लगाए रहीस।
पूर्व मुख्यमंत्री भूपेश बघेल ह मीडिया ले गोठबात करत कहिन कि ए मामला ह पूरी तरह ले न्यायिक प्रक्रिया के तहत चलत हे। न्यायालय ह फैसला दे हे, अब ओ फैसला के विरोध म हमन हाई कोर्ट जाबो।
ए मामला म पूर्व मुख्यमंत्री भूपेश बघेल के संग कारोबारी कैलाश मुरारका, विनोद वर्मा, विजय भाटिया अउ विजय पांडेय घलो आरोपी हें। कैलाश मुरारका अउ विनोद वर्मा ह खुद ल आरोप मुक्त करे बर आवेदन दे रहीन, जेला सेशन कोर्ट ह खारिज कर दीस अउ कहिस कि ओ मन के खिलाफ पर्याप्त सबूत मौजूद हे, एखर बर ओ मन ल ट्रायल के सामना करना पडही।
का हे पूरा मामला? ए मामला के सुरूवात अक्टूबर 2017 म होय रहीस, जब छत्तीसगढ़ म कथित सेक्स सीडी बाहिर आईस। भाजपा नेता प्रकाश बजाज ह 26 अक्टूबर 2017 ल पंडरी थाना म एफआईआर दर्ज कराए रहीस। ओ ह ब्लैकमेलिंग अउ अश्लील वीडियो के नाम म पइसा मांगे के आरोप लगाए रहीस। एखर बाद पुलिस अउ सीबीआई ह जांच सुरू करीस। सितंबर 2018 म तत्कालीन कांग्रेस प्रदेश अध्यक्ष भूपेश बघेल अउ विनोद वर्मा ल गिरफ्तार घलो करे गे रहीस। ए मामला के एक आरोपी रिंकू खनूजा ह खुदकुशी कर ले रहीस।
