सोशल मीडिया में लाइक-शेयर के लालच मा स्कूल प्रिंसिपल ले 22 लाख के ठगी

Cyber Fraud : रायपुर : भवानी नगर कोटा के रहेवइया अउ सेंट पॉल्स चर्च इंग्लिश हायर सेकेंडरी स्कूल के प्रभारी प्राचार्या मनीषा कुलदीप ह ऑनलाइन ठगी के बड़े शिकार होगे हे। ठग मन ह ओला इंस्टाग्राम अउ फेसबुक मा पोस्ट लाइक अउ शेयर करे के टास्क देके 22 लाख 91 हजार रुपिया के चूना लगा दीन।

Cyber Fraud : अइसने फंसिस जाल मा ठग मन ह मनीषा ला 20 सितंबर 2025 के ‘क्वालिटी टास्क लिंकेज’ नाम के एक टेलीग्राम ग्रुप मा जोड़िन। सुरू मा भरोसा जीते बर ठग मन ह 150 अउ 500 रुपिया जमा करवा के ओला मुनाफा घलो दीन। जब ओला 5 लाख रुपिया मिले के बारी आइस, तब ठग मन ह खेल सुरू कर दीन। ओ मन कहिन कि पैसा निकाले के बखत एक ‘शून्य’ जादा डल गे हे, जेखर से अकाउंट सीज होगे हे। एला ठीक करे बर अउ पैसा जमा करे बर कहिन।

करजा लेके भरिस पैसा प्राचार्या ह मुनाफा के लालच मा आके अपन जमा पूंजी के संग-संग गोल्ड लोन, पर्सनल लोन अउ अपन पति अउ भाई ले पैसा मांग के कुल 21 लाख 91 हजार 541 रुपिया ठग मन के बताए खाता मा डाल दीस। जब ठग मन ह अउ पैसा के मांग करे लगिन, तब ओला ठगी के अहसास होइस।

पुलिस करत हे जांच सरस्वती नगर थाना पुलिस ह बीएनएस के धारा 318-4 के तहत केस दरज कर ले हे। जांच मा पता चले हे कि ठग मन ह कर्नाटक बैंक, एसबीआई, बंधन बैंक अउ केनरा बैंक के अलग-अलग खाता मा पैसा डलवाए हें। रायपुर जिला मा बीते एक बछर मा ठग मन ह 11 करोड़ रुपिया ले जादा के ठगी कर चुके हें।