Saumya Chaurasia Arrested : शराब घोटाला म सौम्या चौरसिया फेर गिरफ्तार : कोयला के बाद अब दारू के आंच म फँसिस, ईडी ह कोर्ट म करिस पेश!
Saumya Chaurasia Arrested : रायपुर: छत्तीसगढ़ के राजनीति म एक बार फेर भूचाल आ गे हावे। राज्य प्रशासनिक सेवा के निलंबित अधिकारी अउ पूर्व मुख्यमंत्री सचिवालय के ताकतवर चेहरा रहीस सौम्या चौरसिया ल प्रवर्तन निदेशालय (ED) ह फेर ले गिरफ्तार कर ले हावे। 3200 करोड़ रुपया के शराब घोटाला म पूछताछ के बाद मंगलवार के संझा ओला हिरासत म ले गे रहीस, जेखर बाद आज ईडी ह ओला रायपुर के स्पेशल कोर्ट म पेश करिस। ईडी ह अब सौम्या ल रिमांड म ले के पूछताछ करे के तैयारी म हे।
Saumya Chaurasia Arrested : कोयला के बाद अब दारू के खेल म फँसिस
सौम्या चौरसिया के मुसकिल मन कम होय के नाम नई लेवत हे। ओमन पहले ले कोयला घोटाला म मुख्य आरोपी हावे अउ लंबा समय जेल म काटे के बाद पिछले मई म सुप्रीम कोर्ट के शर्त म रिहा होय रहीन। कोर्ट ह ओला राज्य ले बाहर रहे के आदेश दे रहीस, फेर अब शराब घोटाला म ओखर नाम आय के बाद ईडी ह फेर ले ओला दबोच लीस।
का आय ए 3200 करोड़ के शराब घोटाला?
छत्तीसगढ़ म पिछला सरकार के टेम म 2019 ले 2023 के बीच शराब नीति म बड़े फेरबदल करे गे रहीस। आरोप हे कि सरकारी दारू दुकान मन म ‘नकली होलोग्राम’ लगा के अवैध दारू बेचे गे रहीस।
नकली होलोग्राम के मायाजाल: नोएडा के एक कंपनी ले नकली सील अउ होलोग्राम बनवाए गे रहीस।
सरकारी खजाना म डाका: चूंकि होलोग्राम नकली रहीस, एखर सेती शासन ल पता नई चल पाइस कि कतका दारू बिकीस अउ बिना एक्साइज टैक्स पटाए करोड़ों के कमाई करे गीस।
करोड़ों के बंदरबांट: जांच एजेंसी मन के कहना हे कि ए भ्रष्टाचार के पइसा ले नेता, अधिकारी अउ बड़े-बड़े मंत्री मन के घर भरे गीस। एखर से शासन ल लगभग 2165 करोड़ के चूना लगीस।
कतका झन ह जेल के हवा खावत हें?
ए घोटाला म अब तक कई झन बड़े चेहरा मन के गिरफ्तारी हो चुके हे। ए लिस्ट म:
पूर्व आबकारी मंत्री कवासी लखमा
पूर्व मुख्यमंत्री के बेटा चैतन्य बघेल
पूर्व आईएएस अनिल टुटेजा
अनवर ढेबर अउ अउ कई झन अधिकारी मन शामिल हें।
अब सौम्या चौरसिया के गिरफ्तारी ले ए मामला म अउ कई नवा खुलासा हो सकत हे। कोर्ट म पेशी के बाद अब देखना होही कि ईडी ल कतका दिन के रिमांड मिलथे।
Related Posts
