सरपंच अउ पति के कारनामा; सरकारी जमीन ला बेंच के डारिन….
जांजगीर-चांपा। जिला मा सरकारी जमीन के ले-बेच के एक बड़े मामला आगू आय हे। आरोप हे कि सरखों ग्राम पंचायत के सरपंच अउ ओखर पति ह मिलके सरकारी जमीन ला बेंच डारिन अउ ओखर बदला मा लाखों के उगाही करिन। ये मामला के शिकायत ग्रामीण विजेंद्र साहू ह कलेक्टर ले करे हे अउ कड़ी कार्रवाई के मांग रखे हे।
विजेंद्र साहू ह आरोप लगाइस कि सरपंच प्रीति बल्लू राठौर ह अपन पति बलदाऊ राठौर के संग मिलके शिक्षक कमलेश साहू ला 49 डिसमिल सरकारी जमीन ला बेंच दिस। ये सौदा के बदला मा सरपंच डाहर ले करीब 2 लाख रुपिया के अवैध वसूली करे गे हे। शिकायत मा ये घलो कहे गे हे कि जदि रुपिया नई देतीस त जमीन नई मिले के धमकी घलो दे जावत रहिस।
शिकायतकर्ता के कहना हे कि ओखर मन करा ये लेनदेन ले जुड़े एक ऑडियो रिकॉर्डिंग घलो मौजूद हे, जेमा अवैध वसूली के बात साफ सु सुनाई देवत हे। ग्रामीण मन ह मांग करे हें कि सरपंच ऊपर धारा 40 के तहत कार्रवाई करे जाय। संग मा सरपंच के पति, जो सीएसईबी मड़वा प्लांट मा काम करथे, ओखर ऊपर घलो उगाही के मामला मा सख्त कदम उठाए जाय।
