केजरीवाल के रणनीतिकार संदीप पाठक अब भाजपा मा, का छत्तीसगढ़ मा घलो टूट जाही ‘आप’?
Sandeep Pathak : रायपुर। दिल्ली ले लेके देस भर मा आम आदमी पार्टी (आप) के नींव रखे वाले अउ अरविंद केजरीवाल के सबले खास रणनीतिकार संदीप पाठक अब भाजपा मा सामिल हो गे हें। संदीप पाठक मूल रूप ले छत्तीसगढ़ के मुंगेली जिला के रहने वाले हें, अउ बीते दू दशक ले जादा समय ले दिल्ली मा रहके राजनीति करत रहिन। अन्ना आंदोलन के समय ले केजरीवाल के संग जुड़े पाठक ह दिल्ली अउ पंजाब मा ‘आप’ के सरकार बनाय मा बड़े भूमिका निभाय रहिन।
संदीप पाठक ला केजरीवाल के सबले भरोसा मंद साथी माने जात रिस। जब केजरीवाल जेल मा रहिन, तब संगठन के पूरा जिम्मेदारी पाठक ह ही सम्हाले रहिन। पंजाब मा पार्टी ला जीत दिलाय के बाद ओमन ला राज्यसभा भेजे गे रिस अउ छत्तीसगढ़ के प्रभारी घलो बनाय गे रिस, ताकि 2028 के चुनाव मा पार्टी ला मजबूत कर सकें।
छत्तीसगढ़ मा ‘आप’ के का होही? संदीप पाठक के भाजपा मा जाय के बाद अब छत्तीसगढ़ मा आम आदमी पार्टी के भविष्य ला लेके चरचा तेज हो गे हे। राज्य मा पार्टी पहिली ले ही कमजोर होवत जात हे। 2023 के विधानसभा अउ 2024 के लोकसभा चुनाव के समय पहिली ही कोमल हुपेंडी समेत कई बड़े नेता भाजपा मा जा चुके हें। अब पाठक के जाय ले पार्टी के टूटे के डर अउ बढ़ गे हे।
भाजपा ह करिस स्वागत मुख्यमंत्री विष्णुदेव साय ह ‘आप’ सांसद मन के भाजपा मा प्रवेश ला लेके कहिन कि भाजपा दुनिया के सबले बड़े पार्टी आय अउ प्रधानमंत्री मोदी पर सबो के बिसवास बढ़त जात हे। मुंगेली के भाजपा नेता नरेश गुप्ता ह घलो सोशल मीडिया मा पोस्ट लिखके संदीप पाठक के स्वागत करिन।
दूसर कोती, छत्तीसगढ़ ‘आप’ के कार्यकारी अध्यक्ष उत्तम जायसवाल के कहना हे कि भाजपा के तोड-फोड़ के राजनीति सफल नहीं होही। कोनो के जाय ले पार्टी ला कोनो फरक नहीं पड़े।
