साय कैबिनेट के बड़े फैसला: 125 दिन रोजगार के गारंटी, गांव मन म खुलही आजीविका हाट, बायोगैस नीति ला मिलीस मंजूरी
sai cabinet decisions : रायपुर। मुख्यमंत्री विष्णु देव साय के अध्यक्षता म मंत्रालय म मंत्रिपरिषद के बड़ बैठक होईस। ए बैठक म ग्रामीण विकास, रोजगार, आजीविका अउ हरित ऊर्जा ले जुड़े कतको महत्वपूर्ण फैसला मन म मुहर लगाय गिस। कैबिनेट ह गांव मन म रोजगार के गारंटी देहे, आर्थिक गतिविधि बढ़ाए अउ स्वच्छ ऊर्जा ला बढ़ावा देहे बर तीन बड़ योजना मन ला मंजूरी देहे हे।
125 दिन रोजगार के गारंटी अउ 4 हजार करोड़ के बजट
कैबिनेट ह “विकसित भारत-रोजगार और आजीविका के लिये गारंटी मिशन (ग्रामीण) – वीबी-जी राम जी योजना छत्तीसगढ़” ला मंजूरी दे दे हे। अब गांव के मनखे मन ला हर बछर 125 दिन के रोजगार के गारंटी कानूनी रूप ले मिलही। सरकार के कहना हे कि एखर ले पलायन रुकही। ए योजना बर बछर 2026-27 के बजट म 4 हजार करोड़ रुपिया के प्रावधान करे गिस हे, जेम केंद्र के 60% अउ राज्य के 40% हिस्सा रहिही।
गांव मन म खुलही ‘अटल आजीविका समृद्धि हाट’
गांव के अर्थव्यवस्था ला मजबूत करे बर “अटल आजीविका समृद्धि हाट” योजना सुरु करे जाही। एखर तहत गांव मन म हथकरघा, सिलाई-बुनाई, हस्तशिल्प केंद्र के साथे-साथ दलहन, तिलहन, राइस मिल अउ डेयरी जइसन काम सुरु करे जाही। कोल्ड स्टोरेज, सोलर ड्रायर अउ अटल डिजिटल केंद्र घलो बनाए जाही, जेखर ले नोनी-बाबू अउ सियन मन ला गांव म ही रोजगार अउ बाजार मिल सकही।
बायोगैस नीति 2026 ला घलो मंजूरी
मंत्रिपरिषद ह “छत्तीसगढ़ कम्प्रेस्ड बायोगैस नीति 2026” ला घलो पास कर दे हे। अब पैरा-कचरा अउ गोबर ले कम्प्रेस्ड बायोगैस (CBG) बनाए जाही। एखर ले पर्यावरण साफ रहिही अउ जैविक खाद घलो मिलही। ‘अंजोर विजन-2047’ के तहत हर बछर 5 लाख टन बायोगैस बनाए के लक्स रखे गिस हे। छत्तीसगढ़ बायोफ्यूल विकास प्राधिकरण ला एखर नोडल एजेंसी बनाए गिस हे।
