RTE मा प्रवेश नई देइया स्कूल मन के खैर नई, सासन ह दीस मान्यता रद्द करे के चेतावनी
RTE Chhattisgarh : रायपुर। छत्तीसगढ़ सासन ह शिक्षा के अधिकार कानून (RTE) ला लेके कड़ा रुख अपनाय हे। सरकार ह साफ कह दीस हे कि जउन भी निजी स्कूल RTE के तहत गरीब लइका मन ला प्रवेश दे मा आनाकानी करहीं, ओमन के मान्यता ला तुंरत रद्द कर दे जाही। बता दन कि प्राइवेट स्कूल एसोसिएशन ह पैसा (प्रतिपूर्ति राशि) बढ़ाए के मांग ला लेके लइका मन ला दाखिला नई दे के गोठ कहि रहीस, जेकर बाद सरकार ह ये सख्त फैसला लीस हे।
मुख्यमंत्री विष्णु देव साय के सरकार ह साफ कर दीस हे कि प्रदेश के 6,862 निजी स्कूल मन मा 25 प्रतिशत सीट ह गरीब अउ कमजोर वर्ग के लइका मन बर आरक्षित हे। ये नियम ला मानना स्कूल मन के जिम्मेदारी हे। शिक्षा विभाग के कहना हे कि छत्तीसगढ़ मा लइका मन बर जउन पैसा सरकार डहार ले स्कूल ला दे जाथे, ओ ह पड़ोसी राज्य मध्य प्रदेश, उत्तर प्रदेश अउ बिहार ले घलो जादा हे। छत्तीसगढ़ मा पहिली ले पांचवीं तक 7,000 रुपया अउ छठवीं ले आठवीं तक 11,400 रुपया सालाना दे जावत हे।
अभी के समय मा छत्तीसगढ़ के निजी स्कूल मन मा RTE ले लगभग 3 लाख 63 हजार ले जादा लइका मन पढ़त हें। ये साल घलो पहली कक्षा मा 22,000 सीट मा भर्ती के काम चलत हे। सासन ह अभिभावक मन ला कहिस हे कि ककरो बहकावा मा झन आवं। अगर कोनो स्कूल प्रवेश दे ले मना करथे, त ओकर खिलाफ कड़ा कार्रवाई करे जाही। सरकार ह साफ कह दीस हे कि गरीब लइका मन के पढ़ाई-लिखाई मा कोनो बाधा नई आने दे जाय।
