रामगोपाल अग्रवाल के कारनामा! चार्जशीट में खुलासा—कांग्रेस भवन ला बना दे रिहिस घपला-घोटाला के ‘कलेक्शन सेंटर’
रायपुर: छत्तीसगढ़ के बहुचर्चित दारू (शराब) अउ कोयला घोटाला में कतको दिन ले फरार चलत कांग्रेस के पहिली के कोषाध्यक्ष रामगोपाल अग्रवाल ला पुलिस (EOW) ह धर दबोचे हे। ओकर गिरफ्तारी के बाद राजनीति गरमा गे हे। आर्थिक अपराध अन्वेषण ब्यूरो (EOW) अउ प्रवर्तन निदेशालय (ED) के चार्जशीट में अइसन-अइसन बात समने आय हे, जेला सुन के सबो झन हक्का-बक्का रह गे हें। जांच एजेंसी मन के कहना हे कि जब रामगोपाल अग्रवाल कांग्रेस के कोषाध्यक्ष रिहिस, तब प्रदेश कांग्रेस कमेटी (PCC) के दफ्तर यानी राजीव भवन ही वसूली अउ घपला के मेन अड्डा बन गे रिहिस।
‘सेठजी’ अउ ‘सामान’ कोडवर्ड के खेल
जांच रिपोर्ट के मुताबिक, ये पूरा खेल में रामगोपाल अग्रवाल ला कोडवर्ड में ‘रायपुर वाले सेठजी’ कहे जात रिहिस। अउ जतका घूस अउ वसूली के नगद पइसा रहिस, ओला भेजे बर ‘सामान’ सब्द के प्रयोग करत रिहिस हें। लगभग 1500 पन्ना के पूरक चार्जशीट में ये खुलासा होय हे कि कोयला लेवी अउ आबकारी घोटाला के करोंडो रूपिया सीधे कांग्रेस भवन पहुंचाए जात रिहिस।
कइसन चलत रिहिस रामगोपाल अग्रवाल के ये पूरा धंधा?
चार्जशीट में अग्रवाल के पीए (PA) अउ पार्टी के एकाउंटेंट देवेंद्र दड़सेना के बड़ हाथ बताए गे हे।
पइसा लेना अउ बांटना: रामगोपाल अग्रवाल के कहे मुताबिक देवेंद्र दड़सेना ह कांग्रेस भवन में बइठ के पूरा पइसा के हिसाब-किताब रखत रिहिस। ओही पइसा ला लेवय अउ आगे बांटे के काम करत रिहिस।
बैंक अउ नगद के हेराफेरी: ये पूरा लेन-देन सिरिफ नगद में बस नहीं होवत रिहिस, बल्कि दूसर मन के फर्जी खाता (नामधारी अकाउंट) खुलवा के बैंक ले घलो ट्रांसफर करे जात रिहिस।
निजी अउ चुनावी खरचा: जांच एजेंसी मन के आरोप हे कि ये कारी कमाई के बड़ हिस्सा राजनीति अउ चुनाव के काम में अउ अपन खुद के फायदा बर खरच करे गे हे।
880 करोड़ रूपिया के नगद डिलीवरी!
ED के चार्जशीट के पेज नंबर 15, 17 अउ 18 में गवाह मन के बयान के आधार पर बताए गे हे कि ओ समे के सत्ताधारी पार्टी (कांग्रेस) ला दारू घोटाला के कमीशन के बड़ हिस्सा भेजे जात रिहिस।
पप्पू बंसल नाम के मनखे ह अनवर ढेबर के खास दिपेन चावड़ा के माध्यम ले ये अवैध पइसा बटोरत रिहिस। पूछताछ में ये बात समने आईस कि:
लगभग 80 ले 100 करोड़ रूपिया केके श्रीवास्तव ला दिए गिस।
अउ 860 ले 880 करोड़ रूपिया के भारी-भरकम नगद रासि सीधे कांग्रेस भवन में देवेंद्र दड़सेना ला सउंपे गिस।
गवाह मन ह कबूल करे हें कि ओमन ला पहिली ले मालूम रिहिस कि ये पूरा पइसा दारू घोटाला के हरे अउ रामगोपाल अग्रवाल के कहे मुताबिक ही एला ठिकाना लगाए जात रिहिस।
कांग्रेस के पलटवार: “ये हा बीजेपी के राजनीतिक साजिस आय”
दूसर कोति, कांग्रेस ह ये पूरा कारवाही ला राजनीति ले प्रेरित बताए हे। प्रदेश कांग्रेस अध्यक्ष दीपक बैज ह रामगोपाल अग्रवाल के गिरफ्तारी पर कड़ा अबरोध जतावत कहीन कि ये भारतीय जनता पार्टी (BJP) के राजनीतिक षड्यंत्र आय।
दीपक बैज के कहना हे कि विधानसभा चुनाव के समे ले ही बीजेपी ह केंद्रीय एजेंसी मन (ED, IT, CBI) के गलत इस्तेमाल करके कांग्रेस के छबि ला खराब करे के कोसिस करत हे। ओमन दावा करिन कि जउन मामला में ED ला कुछु नहीं मिलिस, अब राज्य के EOW ला आगे करके झूठा मुकदमा दर्ज करवाए जात हे। कांग्रेस ये लड़ाई ला कोर्ट में अउ जनता के बीच पूरा मजबूती ले लड़ही अउ ये साजिस ह जल्दी चघ्घा (बेनकाब) होही।
