देश के 10 राज्य मन के 37 राज्यसभा सीट बर चुनाव के एलान, 16 मार्च के डारी जाही वोट
Rajya Sabha Election 2026 : नई दिल्ली : भारतीय निर्वाचन आयोग ह 10 राज्य मन के 37 राज्यसभा सीट बर चुनाव कार्यक्रम के घोषणा कर दीस हे। ये सीट मन बर 16 मार्च 2026 के वोटिंग होही अउ ओही दिन संझा के चुनाव के नतीजा घलो आ जाही। ये चुनाव ओ सदस्य मन के रिटायर होय के सेती कराए जावत हे, जेकर कार्यकाल अप्रैल 2026 म खत्म होवत हे। चुनावी बिगुल बाजत ही छत्तीसगढ़, बिहार, बंगाल अउ महाराष्ट्र समेत जम्मो राज्य मन म राजनीतिक सरगर्मी बाढ़ गे हे।
छत्तीसगढ़ के दू सीट मन म सबकर नजर टिके हे, जिहां ले फुलो देवी नेताम अउ के.टी.एस. तुलसी रिटायर होवत हें। बिहार के 5 अउ पश्चिम बंगाल के 5 सीट मन म घलो कड़ा मुकाबला होय के उम्मीद हे। महाराष्ट्र म सबले जादा 7 सीट म चुनाव होय बर हे, जिहां शरद पवार, रामदास अठावले अउ प्रियंका चतुर्वेदी जइसे दिग्गज नेता मन के कार्यकाल पूरा होवत हे। एकर अलावा तमिलनाडु (6), ओडिशा (4), असम (3) अउ हरियाणा, हिमाचल, तेलंगाना के सीट मन म घलो चुनाव के प्रक्रिया पूरा करे जाही।
चुनाव के पूरा कार्यक्रम:
अधिसूचना (Notification): 26 फरवरी 2026
नामांकन के आखिरी तारीख: 5 मार्च 2026
नामांकन के जांच: 6 मार्च 2026
नाम वापसी: 9 मार्च 2026
वोटिंग अउ रिजल्ट: 16 मार्च 2026
जम्मो राज्य मन म विधानसभा के विधायक संख्या के आधार म राजनीतिक दल मन ह अपन समीकरण बिठाना शुरू कर दीन हें। अधिसूचना जारी होय के साथ ही नामांकन के प्रक्रिया म तेजी आही।
