सटोरिया बाबू खेमानी के घर छापा म 5 लग्जरी गाड़ी अउ करोड़ों के संपत्ति के होइस खुलासा
Raipur Police Raid : रायपुर। क्रिकेट सट्टा के मास्टरमाइंड बाबू उर्फ गुलशन खेमानी के घर शुक्रवार के पुलिस ह बड़का छापामार कार्यवाही करिस। जांच-पड़ताल के बेरा पुलिस ल 5 ठन महंगी कार के साथ बाबू खेमानी अउ ओकर परिवार के करोड़ों के संपत्ति के पता चलिस हे।
गंज पुलिस अउ क्राइम ब्रांच के 10 टीम मन शुक्रवार के बाबू के आमानाका स्थित मारुति एनक्लेव वाले मकान म छापा मारिन। सर्च वारंट लेके पहुंचे पुलिस टीम ल घर म बाबू अउ करण के पत्नी मन के साथ ओकर महतारी घलो मिलिस।
जानकारी के मुताबिक, मारुति एनक्लेव के घर के अलावा रविभवन म मोबाइल दुकान, जोरापारा म गोदाम, महासमुंद-बागबाहरा मेनरोड म 1 एकड़ जमीन के अलावा बीएमडब्ल्यू अउ क्रेटा सहीत 5 ठन लग्जरी गाड़ी मन मिलिस हे। पुलिस ह अब बाबू, करण अउ ओकर ददा के बैंक खाता मन के ट्रांजेक्शन के जांच शुरू कर दे हे। ये मन ऑनलाइन सट्टा बर अलग-अलग नाम ले 50 ले जादा आईडी बनाय रिहिन अउ कई फर्जी खाता मन के घलो उपयोग करत रिहिन।
आरोपी बाबू पहिली महादेव बुक ऐप ले जुड़े रिहिस, ओकर बाद खुद के सट्टा के धंधा शुरू कर दिस। खुद ल सोशल मीडिया इन्फ्लुएंसर बताय वाला बाबू इंस्टाग्राम म गाली-गलौज अउ आपत्तिजनक वीडियो घलो बनावत रिहिस। सटोरिया बाबू के साथ सहर के एक पूर्व महापौर के भतीजा के वीडियो घलो सोशल मीडिया म जम्मों वायरल होवत हे, जेमा दुनो झन गाली-गलौज करत गोठियावत हें। बता दन कि कबीर नगर सट्टा कांड के कार्यवाही के बेरा बाबू के ये बड़े रैकेट के खुलासा होय रिहिस, जेकर बाद ले पुलिस ह ओकर खोज-खबर लेवत रिहिस।
