रायपुर में शाकाहारी खाना मंगाए म निकलिस मुर्गा के टुकड़ा, शिक्षिका मन के फुटिस गुस्सा

raipur veg food non veg controversy : रायपुर। छत्तीसगढ़ के राजधानी रायपुर ले एकठन अचरज म डाले वाला मामला आगू आई हे। यां एकठन रेस्टोरेंट म शाकाहारी खाना के ऑर्डर दिए के बाद ओमा मुर्गो (चिकन) के टुका मिले के दावा करे जात हे। ए घटना ले जुड़ा एकठन वीडियो सोशल मीडिया म तेजी ले वायरल होवत हे, जेमा कुछु महिला मन रेस्टोरेंट के मालिक अउ कर्मचारी मन ला जमके फटकार लगावत नजर आवत हें।

दावा करे जात हे कि वायरल वीडियो 15 अगस्त के ए। बताए जात हे कि स्कूल के कार्यक्रम के बाद कुछु शिक्षिका मन खाना खाए बर मंदिर हसौद इलाका के एकठन रेस्टोरेंट पहुंचे रिहीन। ए दौरान ओमन शाकाहारी खाना के ऑर्डर दिए रिहीन। खाना परोसे के बाद शिक्षिका मन जैसे ही खाए बर शुरू करीन, ओमन ला थारी म शाकाहारी खाना के संग मुर्गो के टुका दिखे लागिस। एखर बाद उहां विवाद के स्थिति बन गे। शिक्षिका मन रेस्टोरेंट प्रबंधन अउ कर्मचारी मन ला एला लेके अपन नाराजगी जताईन अउ जमके हंगामा करीन।

वायरल वीडियो म महिला मन रेस्टोरेंट के कर्मचारी अउ मालिक ले सवाल-जवाब करत नजर आवत हें। महिला मन के अरोप हे कि ओमन साफ-साफ शाकाहारी खाना के ऑर्डर दिए रिहीन, एखर बावजूद ओमन के खाना म मांसाहारी मिलाए गे रिहिस। वीडियो म एकठन महिला ह ए अरोप घलो लगावत नजर आवत हे कि ओमन के खाना म जानबूझके मांसाहारी मिलाए गिस, जेखर ले ओमन के धार्मिक भावना ला ठेस पहुंचे हे।

ए मामला म पुलिस म शिकायत दर्ज कराए गे हे कि नई, एखर जानकारी अभी आगू नई आई हे। उहें रेस्टोरेंट प्रबंधन के कोती ले ए पूरा मामला म कानो आधिकारिक बयान आय हे कि नई, ए घलो साफ नई हे।