पासपोर्ट ऑफिस ला बम मा उड़ाए के धमकी, मचीस हड़कंप, तमिलनाडु ले जुड़े हे तार…
Raipur Passport Office Threat : रायपुर। राजधानी रायपुर के पासपोर्ट कार्यालय ला बम मा उड़ाए के धमकी मिले ले पूरा सहर मा हड़कंप मच गे हे। कोनो अनजान मनखे ह ईमेल के माध्यम ले पासपोर्ट ऑफिस ला 12 ठन बम मा उड़ाए के धमकी दे हे। जइसने एखर खबर मिलिस, पुलिस महकमा ह एकदम अलर्ट हो गे। ये पूरा मामला सिविल लाइन थाना क्षेत्र के आय।
धमकी भरा मेल मिले के बाद पुलिस अउ सुरक्षा एजेंसियां मन एकदम सक्रिय हो गे हें। ऑफिस के चारों कोती सुरक्षा बढ़ा दे गे हे अउ बने ले जांच-पड़ताल करे जावत हे। बम निरोधक दस्ता (BDDS) अउ डॉग स्क्वॉड के टीम घलो मौका मा पहुँच के कोना-कोना ला छानत हें। पुलिस ह अज्ञात आरोपी के खिलाफ अपराध दर्ज कर ले हे अउ ईमेल के तकनीकी जांच सुरु कर दे हे। साइबर सेल के मदद ले मेल भेजे वाला ला धरे के कोसिस करे जावत हे।
तमिलनाडु ले जुड़े हे मेल के तार
अभी तक कोनो घलो संदेही सामान मिले के पुस्टि नई होय हे, फेर सावधानी बर सुरक्षा व्यवस्था ला कड़ा कर दे गे हे। पुलिस अधिकारी मन के कहना हे कि मामला ला गंभीरता ले जांचे जावत हे अउ जल्दी ही आरोपी ला धर ले जाही। सिविल लाइन थाना प्रभारी यामन देवांगन ह बताइस कि पासपोर्ट ऑफिस ला उड़ाए के धमकी मिले हे, जेखर मेल ह तमिलनाडु राज्य ले जुड़े हे। पुलिस ह FIR दर्ज कर विवेचना सुरु कर दे हे।
