रायपुर मा अब LPG के झंझट खतम! घर-घर पाइप ले पहुंचही गैस, हरियाणा के कंपनी ल मिलिस कॉन्ट्रैक्ट
PNG Gas Service Raipur : रायपुर। राजधानी रायपुर मा नेचुरल गैस पाइप लाइन डारे के काम जल्दी सुरू होही। एखर बर पेट्रोलियम मंत्रालय ह हरियाणा सिटी गैस कंपनी ल अधिकृत करे हावे। अभी ये योजना सहर मा सुरूआती दौर मा हे। संबंधित एजेंसी ल सहर मा गैस पाइप लाइन डारे ले पहिली नियम के मुताबिक नगर निगम ले एनओसी (NOC) लेना होही, संग ही तय दर के हिसाब ले सुल्क घलो जमा करे बर परही, ताकि केंद्र सरकार के मंशा के मुताबिक मनखे मन ल प्राकृतिक गैस लाइन के सुबिधा जल्दी मिल सके। ए दौरान कोनो घलो नागरिक ल कोनो किसम के तकलीफ झन होवय, एखर घलो धियान रखे जाही। मंगलवार के निगम आयुक्त विश्वदीप ह गांधी सदन मा हरियाणा सिटी एजेंसी के प्रतिनिधि राकेश रंजन अउ दसों जोन के जोन कमिश्नर मन के संग बैठक करिन।
पाइप लाइन टूटिस त खैर नई निगम आयुक्त विश्वदीप ह हरियाणा सिटी गैस एजेंसी के प्रतिनिधि ल साफ कहिन हे कि ओमन निगम के जल अउ नगर निवेश विभाग के अधिकारी मन संग तालमेल बनाके सहर मा गैस पाइप लाइन डारे के काम करंय। ओमन ये घलो निर्देश दीन कि पीयइया पानी के पाइप लाइन कोनो घलो हालत मा नई टूटना चईये। संग ही, सहर मा गैस पाइप लाइन बिछाए बर जो सड़क मन ल खोदे जाही, ओखर तुरंत मरम्मत करे जाए। बैठक मा आयुक्त ह जम्मो इंजीनियर मन ल निर्देश दीन कि गर्मी के दिन मा पाइप लाइन डारे के काम ले मनखे मन ल कोनो असुबिधा झन होवय।
ए बैठक मा अपर आयुक्त पंकज शर्मा, दसों जोन के जोन कमिश्नर, नगर निवेश विभाग के कार्यपालन अभियंता आशुतोष सिंह, सहायक अभियंता नितीश झा, उप अभियंता रविप्रभात साहू अउ हरियाणा सिटी गैस एजेंसी के प्रतिनिधि मन सामिल रहिन।
