संपत्तिकर जमा करे के आज आखिरी दिन, रायपुर निगम ह एक दिन म वसूलिस 1.55 करोड़
Property Tax : रायपुर। नगर निगम म संपत्तिकर जमा करे के आज आखिरी दिन ए। 6.25% तक के छूट के फायदा ले बर करदाता मन बड़े संख्या म टैक्स पटावत हें।
नगर निगम कोति ले संपत्तिकर म मिलत छूट के फायदा उठाए बर सहर के लोगन मन आखिरी दिन म बड़े संख्या म टैक्स जमा करत हें। एकर असर सोमार के नगर निगम के राजस्व वसूली म साफ देखाय दिस। निगम ह एक ही दिन म 1070 संपत्ति मन ले 1 करोड़ 55 लाख 63 हजार 119 रुपिया के संपत्तिकर वसूल करिस।
नगर निगम प्रसासन के मुताबिक, 30 जून तक संपत्तिकर के पूरा पइसा पटाए वइया करदाता मन ला जादा से जादा 6.25 प्रतिसत तक के छूट के फायदा देवाय जात हे। एही कारण आय कि आखिरी तारीख ले पहिली करदाता मन के भीड़ लगातार बढ़त जात हे। अधिकारी मन के मानना हे कि आखिरी दिन यानी मंगनवार के वसूली के आंकड़ा अउ बाढ़ सकत हे।
नगर निगम के दफ्तर मन म अउ ऑनलाइन माध्यम ले बड़े संख्या म नागरिक मन संपत्तिकर जमा करत हें। निगम के कहना हे कि समे पर टैक्स पटाए ले न केवल नागरिक मन ला छूट के फायदा मिलही, बल्कि नगर निगम ला घलो विकास के काम बर जरूरी राजस्व मिल जाही।
जोन के हिसाब से वसूली अइसने रहीस: जोन-4 : 20.85 लाख रुपिया जोन-9 : 20.55 लाख रुपिया जोन-8 : 18.96 लाख रुपिया जोन-5 : 15.03 लाख रुपिया जोन-10 : 12.06 लाख रुपिया जोन-7 : 11.01 लाख रुपिया जोन-3 : 10.98 लाख रुपिया
नगर निगम ह करदाता मन ले अपील करे हे कि ओमन 30 जून तक अपन संपत्तिकर जमा करके जादा से जादा 6.25 प्रतिसत छूट के फायदा जरूर उठावन। आखिरी दिन टैक्स पटाए बर निगम के जम्मो जोन दफ्तर मन के संग ऑनलाइन भुगतान के सुबिधा घलो खुला हे। निगम ला उम्मीद हे कि आखिरी दिन म रिकार्ड स्तर म संपत्तिकर के वसूली होही।
वसूली अभियान के बेरा म जोन-6 राजस्व बिभाग के टीम ह वार्ड-61 म बकाया संपत्तिकर नहीं पटाए वइया चार ठन आवासीय-व्यावसायिक परिसर मन ला सील कर दिस। कारबाही सुरु होतेच एक संपत्ति वाले ह तुरते मौका म 33,175 रुपिया के पार्ट पेमेंट जमा करिस। नगर निगम के अधिकारी मन साफ कह दिहिन हें कि पइसा नहीं पटाए वइया मन के खिलाफ आगे घलो सीलबंदी अउ कुरकी जइसन कारबाही चलत रही।
