रायपुर मा कांग्रेस के हल्ला बोल: भूपेश बघेल कहिन– 56 इंच के बात करइया सरकार मा आज मनखे मन ला सिलेंडर अउ खाद घलो नइ मिलत हे
Raipur Congress Protest 2026 : रायपुर। छत्तीसगढ़ मा मनरेगा के नाम बदले, गैस सिलेंडर के बढ़त दाम, बेरोजगारी, अफीम के खेती अउ बिगड़त कानून व्यवस्था ला लेके आज कांग्रेस ह विधानसभा के घेराव करिस। घेराव ले पहिली भारत माता चौक मा एक बड़का सभा होइस, जेमा कांग्रेस प्रभारी सचिन पायलट, पूर्व मुख्यमंत्री भूपेश बघेल, नेता प्रतिपक्ष चरणदास महंत अउ प्रदेश अध्यक्ष दीपक बैज संग हजारों कार्यकर्ता मन सामिल होइन।
“विश्व गुरु अब गुरु घंटाल बन गे हें” – भूपेश बघेल
प्रधानमंत्री नरेंद्र मोदी ऊपर सीधा हमला बोलत हुए भूपेश बघेल ह कहिन कि 56 इंच के सीना के बात करइया सरकार आज किसान मन ला डीएपी (DAP) खाद तक नइ दे पावत हे। ओमन कहिन कि आज देश मा गैस सिलेंडर के कीमत ढाई हजार रुपया तक पहुंच गे हे अउ ओहू ह आसानी ले नइ मिलत हे। बघेल ह तंज मारत हुए कहिन कि “नरेंद्र घलो गायब हे अउ सरेंडर घलो गायब हे।” ओमन आरोप लगाइस कि भाजपा ह मनरेगा अउ गरीबों के अधिकार ला कमजोर करे के काम करत हे। बघेल ह मोदी ला ‘पनौती’ घलो कहिन अउ दावा करिस कि 2028 मा छत्तीसगढ़ अउ 2029 मा देश मा कांग्रेस के सरकार बनही।
बस्तर मा आदिवासी बेटी मन संग अन्याय होत हे
पूर्व सीएम ह बस्तर के मुद्दा उठावत हुए कहिन कि उहां आदिवासी बेटी मन संग गलत काम होत हे अउ जबरदस्ती गर्भपात कराय जावत हे। ओमन आरोप लगाइस कि जब ले आरएसएस (RSS) अउ भाजपा के लोगन मन उहां जाय ला धरें हें, तब ले अइसने मामला बढ़ गे हे। प्रदेश मा अफीम के खेती ला लेके घलो ओमन सरकार ला घेरिं।
गरीब मन के आवाज ला दबावत हे सरकार – चरणदास महंत
नेता प्रतिपक्ष चरणदास महंत ह कहिन कि भाजपा सरकार विरोध के आवाज ला दबाए के कोसिस करत हे। हम ला न सड़क मा बोले दिये जावत हे अउ न विधानसभा मा। देश के खदान मन ला बड़े उद्योगपति मन ला सउंपे जावत हे, जबकि गरीब मन के हक ला मारे जावत हे। ओमन कहिन कि राहुल गांधी के नेतृत्व मा कांग्रेस फेर ले मनरेगा कानून ला मजबूत करही।
बिजली बिल अउ बेरोजगारी ले जनता हलाकान – दीपक बैज
प्रदेश कांग्रेस अध्यक्ष दीपक बैज ह कहिन कि भाजपा सरकार ह ‘हाफ बिजली बिल’ योजना ला बंद कर देहे, जेखर सेती जनता मा हाहाकार मचे हे। ओमन कहिन कि ए सरकार मा जुवा मन बर नौकरी नइ हे अउ किसान मन ले धान खरीदी मा घलो धोखा दे गेहे। बैज ह कहिन कि 2028 मा ए ‘अफीम वाली सरकार’ ला उखाड़ के फेंकना हे।
