ISRO ल बड़का झटका : PSLV-C62 के रास्ता भटकिस, संकट म अन्वेषा सैटेलाइट
PSLV-C62 Launch : श्रीहरिकोटा। भारतीय अंतरिक्ष अनुसंधान संगठन (ISRO) बर साल 2026 के शुरुआत बढ़िया नहीं रहिस। सोमवार, 12 जनवरी के संझा श्रीहरिकोटा ले लॉन्च करे गे PSLV-C62 मिशन आखिरी बखत म तकनीकी गड़बड़ी के शिकार हो गे। ए रॉकेट ह अपन संग भारत के ताकतवर निगरानी सैटेलाइट ‘अन्वेषा’ (EOS-N1) अउ 14 अउ छोटे उपग्रह मन ला लेके उड़ान भरे रहिस, फेर तीसरा चरण (PS3 Stage) म खराबी आए के सेती मिशन ह अपन रद्दा ले भटक गे हे।
PSLV-C62 Launch : तीसरा चरण म बिगड़िस खेल: इसरो चीफ ह दीन जानकारी
इसरो के चेयरमैन डॉ. वी. नारायणन ह बताइस कि PSLV ह चार चरण वाला रॉकेट आय। शुरू के दू चरण ह योजना के मुताबिक सफल रहिस, फेर तीसरा चरण के खत्म होवत बखत रॉकेट के ‘रोल रेट’ (घूमे के गति) म गड़बड़ी आगे। एकर तुरंत बाद रॉकेट ह अपन तय रद्दा ले अलग हो गे। अभी इसरो के वैज्ञानिक मन डेटा के जांच करत हें कि गड़बड़ी कहाँ होइस अउ का सैटेलाइट ला वापस लाइन म लाए जा सकत हे।
‘अन्वेषा’: अंतरिक्ष म भारत के ‘तीसरी आंख’
ए मिशन के सबसे खास हिस्सा EOS-N1 (अन्वेषा) सैटेलाइट आय, जेला डीआरडीओ (DRDO) ह तइयार करे हे। एला ‘भारत के सीसीटीवी’ कहे जावत हे काबर कि ए ह 600 किलोमीटर ऊपर ले घलो घने जंगल, बंकर अउ लुका के घुसपैठ करइया मन ला पकड़े के ताकत रखथे। सेना बर ए ह एक ‘सीक्रेट वेपन’ के बरोबर आय, जेकर ले दुश्मन के हर चाल ऊपर नजर रखे जा सकत रहिस।
विदेशी सैटेलाइट मन ऊपर घलो संकट
PSLV-C62 अपन संग सिरिफ भारत के नहीं, बल्कि फ्रांस, नेपाल, ब्राजील अउ ब्रिटेन के 8 विदेशी सैटेलाइट ला घलो लेके गे रहिस। मिशन के रास्ता भटके ले ए सबो सैटेलाइट मन के भविष्य ऊपर घलो खतरा मंडरावत हे। इसरो के टीम अभी घलो संपर्क साधे के कोसिस म लगे हे।
